Qıyn kezeńderde biz nege jutylyp ketpedik? Dástúr boldy. Birlik, ádildik t.b. qasıetter sonyń ishinde. Keshe ǵana Memleket basshysy qol qoıǵan «Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttary» atty eldik qujatty qoǵam men atqarýshy bılik úshin asa dilgir dep sanaımyz.
Qazirgi memlekettik qurylymnyń ishki saıasat nemese ıdeologııa júıesi syrtqy saıasattaı naqtylyqty, parasattylyqty, sabaqtastyqty qajet etedi. Elimiz jańaryp, jaqsylyqqa bet túzep jatqan shaqta, sondaı-aq álemdik, óńirlik syn-qaterler órship kúrdelengen tusta memlekettilik ustanym men memleketshildik baǵdardy aıqyndap alý – mańyzdy qadam.
Qujatta qazir memleket júrgizip jatqan ishki saıasat qaǵıdattaryn «Zań men tártip» – quqyqtyq memlekettiń negizi, «Halyq únine qulaq asatyn memleket» – ózara is-qımyl quraly, «Ártúrli kózqaras – birtutas ult» – ózara túsinistik ornatý joly, «Kúshti Prezıdent – Yqpaldy Parlament – Esep beretin Úkimet» – basqarý úlgisi, «Adal azamat» – oılaý paıymy, «Taza Qazaqstan» – minez-qulyq pen júris-turys etıkasy» dep júıeli túsindiripti. Eshqandaı pafos joq.
Jalpyulttyq qundylyqtar da búginde ómir saltymyzdyń quramdas bóligine aınalyp keledi. Táýelsizdik pen otanshyldyq, birlik pen yntymaq, ádildik pen jaýapkershilik, zań men tártip, eńbekqorlyq pen kásibı biliktilik, jasampazdyq pen jańashyldyq – sapaly ulttyń ólshemi.
Eldik nyshandardyń naqtylana túskeni – úlken jumystyń izashary. Bardy baıyptata bilýdiń jóni. Jańashyl urannan jaýqazyn ulanǵa deıingini serpiltetin biregeılik.
Ishki saıasattyń jeti basym baǵyty – qoǵamdyq dıalog, etnosaralyq saıasat, din salasyndaǵy saıasat, mádenı-gýmanıtarlyq saıasat, otbasy saıasaty, jastar saıasaty, aqparat saıasaty – eldik uıysýdyń aınasy ıakı barometri bolatyny da anyq.
Prezıdent Q.K.Toqaev Býrabaıda ótken Ulttyq quryltaıda: «Bizdiń ıdeologııamyz qarapaıym ári túsinikti. Bul – jahandaǵy asa kúrdeli geosaıası ahýalda elimizdi jańa damý deńgeıine kóterý úshin berik negiz qalaý» degen edi.
Ras, eldikti bekemdeıtin baǵyt, qaǵıdattar men qundylyqtar qoǵamnyń qaınaýynan shyǵyp, qalaýymen úılesse – memlekettiń mereıi. Búgingi, erteńgi býyn osy baıypty baǵdardan aınymasa ıgi.
Dıhan QAMZABEKULY,
Ulttyq quryltaı múshesi,
«Qazaq gazetteri» seriktestiginiń bas dırektory
