Sport • 07 Qarasha, 2025

Jarys kúndeligi

10 ret

kórsetildi

3 mın

oqý úshin

Jaqynda Parıjde ótken «Masters» týrnıriniń jartylaı fınalyna deıin jetken elimizdiń eń úzdik tennısshisi Aleksandr Býblık ATR-diń jańartylǵan reıtınginde úsh satyǵa joǵarylap, 13-orynǵa taban tiredi. Bul – onyń mansabyndaǵy eń jaqsy kórsetkish. Elena Rybakına WTA reıtıngindegi óziniń altynshy ornyn saqtap qaldy. Juptyq básekedegi eń myqty oıynshymyz Anna Danılına 13-satyda tur.

Ǵalym SÚLEIMEN

Er-Rııadta ótip jatqan WTA-nyń qorytyndy týrnırinde Elena Rybakına tabysty óner kórsetip jatyr. Tusaýkeser kezdesýinde álemniń tórtinshi raketkasy, amerıkalyq Amanda Anısımovanyń tas-talqanyn shyǵarǵan ol ekinshi kezeńde úzdikter tiziminde ekinshi oryndaǵy Iga Shventekpen sheberlik baıqasty. Básekeniń birinshi setinde polshalyq tennısshi basymdyq tanytqanymen, odan keıin Rybakına qarqynyn kúrt kúsheıtip, qarsylasyn bas kótertpeı utty – 3:6, 6:1, 6:0. Úshinshi týrda Medıson Kızben kúsh synasýǵa tıis edi. Alaıda densaýlyǵynyń syr berýine baılanysty AQSh tennısshisi kortqa shyǵýdan bas tartty. Ony reseılik Ekaterına Aleksandrova almastyrdy. Rybakına qarsylasyn 6:4, 6:4 esebimen qapy qaldyrdy. Sóıtip, óz tobynda birinshi oryn alǵan Rybakına jartylaı fınalǵa joldama aldy.

6 jeltoqsanda AQSh-tyń San-Dıego qalasynda kásipqoı bokstan orta salmaqta birneshe beldi nusqalardyń chempıondyq ataǵy úshin Jánibek Álimhanuly (17-0, 12 KO) men kýbalyq Erıslandı Laranyń (31-3-3, 19 KO) judyryqtasatyny belgili. Kúni keshe osy kezdesýde basym túsken boksshynyń kelesi jyly kimmen kúsh synasatyny anyqtaldy. Jekpe-jek jeńimpazy AQSh boksshysy Ostın Ýılıamspen (19-1, 13 KO) aıqasady.

Astanada at sportynyń konýr túrinen el chempıonaty márege jetti. Bıiktigi 145 santımetrge deıingi tosqaýylda «Ýran-Nad Vıgramı» sáıgúligimen Raısa Sokolenko top jarsa, bıiktigi 135 santımetrlik saıysta «Taımazdy» tizgindegen Estella Babaıan bas júldeni oljalady. Jarystyń absolıýtti chempıony ataǵyna Oleg Sokolenko men Estella Babaıan qol jetkizdi.

Qurlyqtyq hokkeı lıgasynda (QHL) kúsh synasyp júrgen «Barys» qatarynan bes oıynda jeńilistiń kermek dámin tatty. Tórtinshi kezdesýde astanalyqtar Nıjnekamskiniń «Neftehımıgin» qabyldady. Birinshi kezeńde esep ashylmady. Odan keıin qonaqtar qarqyndy arttyryp, 5:2 esebimen jeńiske jetti. «Barystyń» sapynda mergendik tanytqandar – Kırıll Panıýkov pen Dinmuhamed Qaıyrjan. Al besinshi kezdesýde Astanada Ýfanyń «Salavat Iýlaev» klýbynan jeńildi. Alǵashqy eki goldy qonaqtar soqsa, aıdyn ıeleriniń tek esepti qysqartýǵa ǵana shamasy jetti – 1:2.