Asa baı tarıhy men dástúri bar ujym bul mereıli datany bas qala tórinde atap ótýdi jón kóripti. Mereıtoılyq kesh teatrdyń negizin qalaǵan tulǵa Natalııa Sastyń shyǵarmashylyq murasyna taǵzym etýge arnaldy. Ańyzǵa aınalǵan ujymdy mereıtoıymen Memleket basshysy Qasym-Jomart Toqaev quttyqtady. Prezıdenttiń quttyqtaý hatyn Mádenıet jáne aqparat mınıstri Aıda Balaeva oqyp berdi.
«Sizderdiń san qyrly shyǵarmashylyqtaryńyz elimizdiń mádenı damýyna, qoǵamymyzda jasampazdyq pen gýmanızm qundylyqtarynyń ornyǵýyna aıryqsha úles qosyp keledi. Memleket teatrdy mádenıet oshaǵy, óner men adamǵa adal qyzmet etýdiń rýhanı keńistigi retinde qabyldaıtyn kózqarastaryńyzdy joǵary baǵalaıdy. Teatrdyń keń aýqymdy qaıta jańǵyrtylýy jańa kórkem ıdeıalardy júzege asyryp, kórermen yqylasyna bólenetin áserli qoıylymdar jasaýǵa tyń múmkindikter ashady dep senemin. Kórermenderdiń shynaıy qýanyshy men alǵysy sizderdi Qazaqstan ıgiligi jolyndaǵy jańa bıikterge jeteleı bersin. Barsha ujymǵa shyǵarmashylyq shabyt, tolaıym tabys jáne teatrdyń odan ári órkendeı berýin tileımin», – delingen Prezıdent quttyqtaýynda.
Sonymen qatar 7 qarasha – ujymnyń qurylǵan kúnimen tuspa-tus kelgen saltanatty keshte teatr qyzmetkerlerine Prezıdent Jarlyǵymen memlekettik nagradalar tabys etildi. Atap aıtqanda, Oleg Gostev «Parasat» ordenimen, Raısa Lesheva men Maqsat Sahıuly «Qurmet» ordenimen, Aıdar Qurmanbaev, Inna Porotıkova, Marına Sambetbaeva jáne Artıom Seleznıov «Eren eńbegi úshin» medalimen marapattaldy. Sondaı-aq Aleksandr Rýsınovıchke «Shapaǵat» medali, Anna Kýzembaevaǵa «Qazaqstannyń eńbek sińirgen qaıratkeri» ataǵy berildi.
Marapattardy Memleket basshysynyń atynan Aıda Balaeva tabys etti.
Teatrdyń tarıhy men dástúrin dáriptegen aıtýly shara odan ári SATS ComUnity balalar stýdııasynyń tárbıelenýshileri sahnalaǵan «Tarıh hattary» atty teatrlandyrylǵan mınıatıýra kórsetilimine ulasty. Bul qoıylym – ult pen urpaq sabaqtastyǵyn, teatrdyń ótken joly men búgingi bıigin beıneleıtin kórkem dúnıe retinde kóziqaraqty teatrsúıer kórermen qaýym kóńilinen aıryqsha oryn aldy. Balalardyń júrek jylýy men taza peıili arqyly sahnaǵa shyqqan qoıylym teatr tarıhyna degen qurmet pen alǵystyń nyshanyndaı áser syılady.
Sondaı-aq elorda kórermenderine teatrdyń negizin qalaýshynyń ómirine negizdelgen «SAS» spektakl-rekonstrýksııasy usynyldy. Qoıylymda Qazaqstandaǵy alǵashqy balalar men jasóspirimder teatrynyń ashylýy qarsańyndaǵy daıyndyq barysy beınelengen.
Sahnalyq sheshim men rejısserlik izdenis kórermendi ótken ǵasyrdyń rýhyna jeteleı otyryp, máńgi jas ónerdiń qudiretin sezindirdi. Qoıylymda Natalııa Sas rólin Qazaqstannyń eńbek sińirgen ártisi, Reseıdiń «Drýjba» ordeniniń kavaleri Tatıana Tarskaıa somdady. Al qoıylym rejısseri – Reseıdiń «Zolotaıa maska» teatr syılyǵynyń laýreaty Galına Pıanova.
Rejısser atap ótkendeı, bul qoıylym – Natalııa Ilınıchna Sastyń shyǵarmashylyq murasyna qurmet kórsetý aıasynda sahnaǵa shyqty. О́ıtkeni Natalııa Sas teatrynyń 80 jyldyq mereıtoıy – tek bir ujymnyń ǵana emes, tutas teatr óneriniń, máńgilik sahna rýhynyń saltanaty.
Galına Pıanova: «Bul qoıylym – Natalııa Ilınıchnaǵa degen súıispenshilik pen iltıpattyń kórinisi. Ol balalar teatrynyń negizin qalap, birneshe býyndy tárbıelegen uly tulǵa», dese, bas keıipker beınesin kemeline keltire keıiptegen aktrısa Tatıana Tarskaıa: «Ol – uly rejısser, orasan talant ıesi. «Tárbıeleý – adamnyń taǵdyryn sheshý» degen onyń sózi – meniń súıikti dáıeksózim. Sas óz ómirin teatr men jas urpaq tárbıesine arnady» dep tulǵaǵa degen qurmetin áserlene áńgimeledi.
