ERG Skills International halyqaralyq kásibı sheberlik saıysy eldegi kadrlyq áleýetti damytý men jumysshy mamandyqtaryn nasıhattaýdyń mańyzdy kezeńine aınaldy.
Sheberlik, tehnologııa, bolashaq. Saıysqa qatysqan 160 úmitker men olardyń tálimgerleri óz mamandyqtaryna adaldyqtyń úlgisin kórsetýde osy ıdeıalyq baǵyttardy ustanatyndaryn baıqatty. Eurasian Resources Group kompanııasy uıymdastyrǵan baıqaýda otandyq taý-ken jáne metallýrgııa kesheniniń úzdik mamandary men stýdentteri jáne Qytaıdan kelgen bilikti qyzmetkerler óner kórsetti. Atap aıtqanda, «Qarmet» AQ, «Altynalmas AK» AQ, «Qazaqmys» Toby, ERG kásiporyndarynyń beldi mamandary bar. Aqsýdaǵy óndiris alańdary men kásiptik kolledjder bul kúnderi kásibılik, quziret pen óndiriske zamanaýı kózqarastary bezbendelgen tartys alańyna aınaldy.
Uıymdastyrýshylar atap kórsetkendeı, baıqaý jumysshy mamandyqtar salasyndaǵy kásibıliktiń etalony sanalatyn – WorldSkills standarttary boıynsha ótkizildi. Quıý isi, dánekerleý tehnologııalary, temir joný men slesarlyq, ónerkásip avtomatıkasy, elektromontaj, CAD ınjenerlik grafıkasy, zerthanalyq-hımııalyq taldaý, eńbekti qorǵaý men taý-ken isi, marksheıderlik, paıdaly qazbany baıytý, sandyq basqarý qondyrǵysy bar stanok operatory syndy 13 negizgi quziret boıynsha ótken jarystar 5 kúnge jalǵasty. Bilim berý baǵytyna erekshe nazar aýdaryldy. ERG men kolledjder alıansy, sondaı-aq basqa da oqý oryndarynyń ókilderi, uzyn sany 15 kolledj ben ýnıversıtet ókilderi qatysty. Bul qatardan Rýdnyı ındýstrıaldyq ınstıtýty, Toraıǵyrov ýnıversıteti, Aqtóbe joǵary polıtehnıkalyq kolledji, Aqsý qara metallýrgııa kolledjin bóle-jara aıtýǵa bolady. Baıqaýǵa qatysqan stýdentter joǵaryda atalǵan oqý oryndary Qazaqstannyń taý-ken metallýrgııa keshenine bilikti mamandar daıyndap otyrǵanyn taǵy bir márte dáleldedi.
«Bizdiń kompanııa kadrlardy daıarlaý ekojúıesin júıeli túrde damytyp keledi. Mektep qabyrǵasynda kásibı baǵdar berýden bastap, kolledjder men joǵary oqý oryndaryndaǵy, sondaı-aq bizdiń korporatıvtik ýnıversıtetimizdegi oqytý baǵdarlamalaryn túgel qamtımyz. ERG Skills International saıysyn ótkizý – atalǵan ekojúıeniń taǵy bir tıimdi elementi. Bul tek jeke mamandar úshin ǵana emes, búkil sala úshin mańyzdy ekenine senimdimin. Ol eńbek standarttaryn joǵarylatyp, jas mamandardyń kásibı quziretterin damytýǵa yqpal etedi», deıdi ERG-diń Qazaqstandaǵy bas dırektory Serik Shahajanov.
О́z sheberligin dáleldeýge bel býǵan qatysýshylar arasynda «Qazaqstan alıýmınııi» AQ elektr stansasynyń 19 jastaǵy qyzmetkeri Qaısar Dáýletbaı da bar. Ol «Tokarlyq is» quziretinde sheberligin kórsetken.
«Búgingi baıqaýda bizdiń komandamyz sáttilikke senip, qoldan kelgen sheberlikterin pash etti. Jarys sharttaryna sáıkes, syzbalar boıynsha tapsyrmalardy oryndap, jańa bólshekter shyǵardyq. Byltyr men WorldSkills Pavlodar – 2024 óńirlik chempıonatynyń jeńimpazy, sondaı-aq EnergySkills júldegeri atandym. Bıylǵy halyqaralyq básekede de úzdikter qatarynan kórinip otyrmyn», deıdi jigerli jas.
ERG Service kompanııasynyń SBB tokari Dmıtrıı Gýsev baıqaý kezindegi erejeler joǵary dáldikti jáne óńdeý tehnologııasyn tereń meńgerýdi talap etkenin jetkizdi.
«Jańa býyndaǵy zamanaýı SBB tokarlik stanogynda jumys isteý ásirese, qyzyqty boldy. Ony shekteýli ýaqyt ishinde ıgerý naǵyz synaqqa aınaldy. Biraq dál osyndaı mindetter kásibı damýǵa jáne óz qabiletińdi arttyrýǵa senimdilik beredi. ERG Skills International-daǵy jeńis – tek jeke kúsh-jigerdiń ǵana emes, sonymen qatar áriptesterimniń jáne ósý úshin barlyq jaǵdaıdy jasap otyrǵan kompanııanyń turaqty qoldaýynyń nátıjesi», dedi Dmıtrıı Gýsev.
Qytaıdyń Shansı energetıkalyq kásiptik-tehnıkalyq kolledjinen qatysqan 2-kýrs stýdenti Hoý Iıý Han Aspanasty elinen 4 birdeı úmitker óner kórsetkenin jetkizdi. Aıtýynsha, bul baıqaýǵa qatysa otyryp ol óziniń kásiptik daǵdylaryndaǵy kemshilikterin ańǵarypty.
«Men úshin bul baıqaý úlken tájirıe alańy boldy. Barlyq jaǵynan úırengen isterim kóp. Tájirıbem áli de az ekenin baıqadym. Qytaıdan kelgen ózge qatysýshylar maǵan qaraǵanda laıyqtyraq óner kórsetti dep oılaımyn», deıdi ol.
Baıqaý qorytyndysynda «Taý-ken isi», «CAD ınjenerlik grafıkasy», «Hımııalyq taldaý zerthanashysy», «Quıý óndirisi», «Marksheıderlik is jáne geodezııa», «Paıdaly qazbany baıytý», «Eńbekti qorǵaý», «О́nerkásiptik avtomatıka», «Dánekerleý tehnologııalary», «Slesarlik is», «Tokarlik is», «SBB tokarlik isi», «Elektromontaj» quziretteri boıynsha úzdikter anyqtaldy.
Jalpy, ERG Skills kásibı sheberlik baıqaýy 2023 jyldan beri jyl saıyn turaqty ótkizilip kele jatyr. Al ERG Skills International kásibı sheberlik konkýrsyn ótkizý kompanııanyń tehnıkalyq jáne kásiptik bilim berý júıesin jańǵyrtýdaǵy, sondaı-aq otandyq taý-ken-metallýrgııa kesheni úshin kadrlar daıarlaýdyń úzdik halyqaralyq tájirıbelerin ilgeriletýdegi kóshbasshylyǵyn rastady. Is-shara óndiristik kásiporyndar men bilim berý uıymdary arasyndaǵy yntymaqtastyqty nyǵaıtýda, kásibı quzirettilikti damytýǵa jáne jumysshy kásipterin tanymal etýge yqpal etetin mańyzdy qadam boldy.
Pavlodar oblysy
Aqsý qalasy
