Birikken Ulttar Uıymynyń mártebesin arttyra túsetin bul týyndy –álemdegi eń bıik jerge salynǵan mýral. Jyldar boıy álemniń ár túkpirinde BUU taqyrybyna arnalǵan iri óner jobalary júzege asqanymen, bul jumys BUU mandaty men ornyqty damý maqsattarynyń mánin qazaqtyń kóshpeli mádenı nyshany arqyly dál beıneleıtin qýatty vızýaldy metaforasymen erekshelenedi.
Living Atmosphere muryndyq bolǵan sýretshi Ádil Áýbekerovtyń uzyndyǵy 36, bıitigi 6 metr bolatyn aýqymdy jumysynyń paıda bolýyna Shymbulak kýrorty, BUU-nyń Qazaqstandaǵy keńsesi qoldaý kórsetken.
Quzar bıiktiktegi mýraldyń saltanatty ashylý rásiminde BUU Jahandyq kommýnıkasııalar departamentiniń ókili Vlastımıl Samek mýraldyń BUU tapsyrysymen emes, qoǵamnyń, jergilikti áriptesterdiń bastamasymen salynǵanyn tilge tıek etti.
Shymbulaq bıigindegi mýraldyń tusaýkeserine qoǵamdyq uıymdar, mádenıet pen dıplomatııalyq korpýstyń jáne BAQ ókilderi qatysty. Qonaqtar taýly aımaqta týǵan joba tujyrymdamasymen, jasalý tarıhymen, tehnıkalyq sheshimderimen tanysty.
«Quraq kórpemizde árbir bólshek mańyzdy, árbir bólik ortaq órnektiń ishinde óz ornyn tabady. Munyń astary bizge jaqyn – biz de damýymyzdy ekologııalyq jaýapkershilikke, sabaqtastyq pen tabıǵatqa degen qurmetke súıene otyryp quramyz. Bul jumys Shymbulak kýrortynyń rýhymen úndesedi», – deıdi Chimbulak Development basqarýshy dırektory Nurlan Seıitqazın.
«Mýral tujyrymdamasy kóshpelilerdiń kórneki de materıaldyq emes murasyna súıenip, sımvoldar tilin zamanaýı kórkem formaǵa aınaldyrady. Árbir bólshek óz maǵynasyn saqtaıdy. Olardy biriktire otyryp, men bizdi qaýym etetin qundylyqtar týraly syr shertip, tabıǵatqa, kórshilerimizge, beıbitshilikke degen qurmetimdi bildiremin. Men úshin bul mýral – BUU 80 jyl boıy qorǵaıtyn qundylyqtardyń mozaıkasy ǵana emes, bolashaqqa baǵyttalǵan kóshpendiler kózqarasy», – deıdi sýretshi Ádil Áýbekerov.
ALMATY
