Ony anyqtaýdyń joly – tájirıbeli qusbegi túz búrkittiń qonaqtaıtyn jerin jáne ushyp-qonýyn baqylaıdy. Odan keıin qonaqtaǵan jerine tastaǵan sańǵyryǵy men túlegen qaýyrsynyna qarap túz búrkittiń jasyn shamalaıdy.
Kelesi kezekti búrkit qonaǵy mańynda onyń ákelgen jemine ortaqtasý úshin dalanyń usaq qustary qosa júredi. Olar búrkitti kórgende ýlap-shýlap dybys beredi.
Osyndaı shart-jaǵdaılarǵa qanyqqan soń búrkit qonaqtaıtyn oryn (butaq, tóbeshik, tas) aıqyn bolǵannan keıin qusbegi dál sol jerge shappa tuzaq qurady.
Tuzaqtyń bul túri jińishke kendirden eki qulash uzyndyqta shıratylyp jasalady. Adam eki qolymen qulashtaı tartqanda úze almaıtyn berik bolýy shart.
Bul tuzaqty qurǵanda uzyndyǵy bir qulashtaı aǵash qyrtysynan solqyldaq etip jasaǵan taqtaıshanyń bir basyn butaqtyń ushyna taman baılaıdy. Ekinshi ushyn butaqtyń túp jaǵyna taman jerge shot temir qaǵyp, shotyna sherte ilindiredi. Buǵan tıekteıtin jiptiń uzyndyǵy úsh qulash mólsherinde bolǵany tıimdi. Jiptiń ekinshi ushyna aǵash toqpaq ilinedi.
Tuzaqtyń ekinshi ushyndaǵy býaldyryǵyn solqyldaq taqtaıdyń ústine jaıady. Býaldyryqtyń túbine taǵy bir tıek baılap, shot aǵashpen solqyldaq taqtaıdyń ilinip shertip turǵan ushynyń arasyna ilekerlep tuzaq qurady. Tuzaqtyń baýyn joǵarydaǵy asha aǵashtyń arasynan túsirip ekinshi toqpaq baılanǵan ushyn salaqtatyp qoıady.
Búrkit kelip qonǵanda solqyldaq taqtaı tómen túsip, tıek shyǵyp ketedi de, tuzaq búrkittiń aıaǵyna qarmap, ony joǵary tartyp áketedi. Toqpaq bolsa jipti tómen tartyp búrkit aspaqtalyp qalady. Bul ádis búrkittiń qanat-quıryǵynyń synyp, jaraqattanýyna biraz qaýpi bar. Sondyqtan qusbegi tuzaq qurǵannan keıin alystap ketpeı aýyq-aýyq baıqap turýy kerek.
