Maqalada Memleket basshysy Qazaqstan men Reseıdiń odaqtas memleket jáne strategııalyq seriktes ekenin, tarıhtyń ózi bizdiń máńgi myzǵymas dostyǵymyzdy aıqyndap bergenin aıtady. Prezıdenttiń sózinshe, barlyq salada aýqymdy áriptestik, gýmanıtarlyq salada tyǵyz yntymaqtastyq óris jaıyp keledi.
«Bizdiń halyqtar ǵasyrlar boıy birge ómir súrip, qýanyshty da, synaqty da birge bólisti, ulan-ǵaıyr Eýrazııa keńistiginde ortaq mádenı óris qalyptastyrdy. Bizdi ortaq dástúrli qundylyqtarǵa degen kózqaras, qazirgi zamannyń ózekti máselelerine qatysty uqsas ustanym jáne baýyrlas halyqtardyń ıgiligi úshin birlesip atqaryp jatqan eńbegimiz biriktiredi. Osy berik irgetasqa súıene otyryp, biz tarıhymyzǵa, mádenıetimizge jáne dástúrlerimizge ózara qurmet tanyta otyryp, kópqyrly yntymaqtastyq jolymen senimdi túrde alǵa basyp kelemiz.
Táýelsizdik alǵan sátten bastap Qazaqstan Reseımen dostyq qatynastardy damytýǵa aıryqsha mán berip keledi. Eldiń alǵashqy syrtqy saıasat tujyrymdamasynda, sondaı-aq keıingi uqsas qujattarda Reseı baǵyty turaqty basymdyq retinde aıqyndaldy. 1992 jyly Máńgilik dostyq, yntymaqtastyq jáne ózara kómek týraly alǵashqy shartqa qol qoıyldy. Bul qujat memleketaralyq qatynastardyń berik negizin qalap, halyqtarymyzdyń sanaly tańdaýyn beınelegen sımvolǵa aınaldy. Sodan beri álemde de, postkeńestik keńistikte de kóp nárse ózgerdi. Alaıda sol shart mátininde aıtylǵan basty qaǵıda ózektiligin joǵaltqan joq: máńgilik dostyq – jaı tirkes emes, ol bizdiń halyqtardyń qazirgi jáne bolashaq kúrdeli de kópqyrly shynaıylyǵyn fılosofııalyq ári saıası turǵydan qabyldaýynyń dál kórinisi», dep atap kórsetti Prezıdent.
Memleket basshysy Qazaqstan men Reseı mazmundy da sapaly strategııalyq áriptestik pen odaqtastyq qatynas ornata aldy deı kele, máńgilik dostyqtyń bizdiń memleketter men halyqtar úshin baǵyt-baǵdar beretin juldyz ispetti ekendigin jetkizedi.
