Birikken Ulttar Uıymynyń mártebesin arttyra túsetin bul sýret – álemdegi erekshe mural. Jyldar boıy álemniń ár túkpirinde asa bedeldi halyqaralyq uıym taqyrybyna arnalǵan iri óner jobalary júzege asqanymen, bul jumys asa bedeldi halyqaralyq uıym mandaty men ornyqty damý maqsattarynyń mazmunyn qazaqtyń kóshpeli mádenıetimen ushtastyryp, kóz tartatyn astarly mánimen de erekshelenedi.
«Living Atmosphere» kompanııasynyń bastamasymen Ádil Áýbákirov salǵan uzyndyǵy – 36, bıiktigi 6 metr aýqymdy týyndynyń ómirge kelýine «Shymbulak» kýrorty, BUU-nyń Qazaqstandaǵy keńsesi qoldaý kórsetipti.
Muraldyń saltanatty ashylý rásiminde BUU Jahandyq kommýnıkasııalar departamentiniń ókili Vlastımıl Samek bul qoǵamnyń, jergilikti áriptesterdiń uıytqy bolýymen salynǵanyn tilge tıek etti.
Shymbulaq bıigindegi muraldyń tusaýkeserine dıplomatııalyq korpýs pen BAQ ókilderi qatysyp, taýly aımaqta týǵan jobanyń tujyrymdamasymen, jasalý tarıhy, tehnıkalyq sheshimderimen tanysty.
«Quraq kórpemizde árbir bólshek mańyzdy, árbir bólik ortaq órnektiń ishinde óz ornyn tabady. Munyń astary janymyzǵa jaqyn – biz de damýymyzdy ekologııalyq jaýapkershilikke, sabaqtastyq pen tabıǵatqa degen qurmetke súıene otyryp quramyz. Bul jumys «Shymbulak» kýrortynyń rýhymen úndesedi», deıdi «Chimbulak Development» basqarýshy dırektory Nurlan Seıitqazın.
«Mural tujyrymdamasy kóshpelilerdiń kórneki de materıaldyq emes murasyna súıenip, sımvoldar tilin zamanaýı kórkem formaǵa aınaldyrady. Árbir bólshek óz maǵynasyn saqtaıdy. Olardy biriktire otyryp, bizdi qaýym etetin qundylyqtar týraly syr shertip, tabıǵatqa, kórshilerimizge, beıbitshilikke degen qurmetimdi bildiremin. Bul mural – BUU 80 jyl boıy qorǵaıtyn qundylyq quraǵy ǵana emes, bolashaqqa baǵyttalǵan kóshpelilerdiń kózqarasy», deıdi sýretshi Ádil Áýbákirov.
ALMATY
