foto: Densaýlyq saqtaý mınıstrligi
Sheteldik pasıentke moıyn omyrtqasy bóliginde jaryq (gryja) dıagnozy qoıylyp, oǵan zamanaýı kópfýnksıonaldy protez qoldaný arqyly operasııa jasaldy. Bul protez moıyn omyrtqasynyń tabıǵı qozǵalysyn saqtaýǵa jáne qımyl-qozǵalystyń tolyq qalpyna kelýine múmkindik beredi.
Ota mıkroskop arqyly, az ınvazıvti tásilmen, zamanaýı hırýrgııalyq qural-jabdyqtardy paıdalana otyryp, joǵary dáldikti mıkrohırýrgııalyq ádisterdi meńgergen mamandardyń qatysýymen júrgizildi.
Pasıent Natalıanyń aıtýynsha, ol Qazaqstanǵa arnaıy maqsatpen kelgen, sebebi uzaq ýaqyt boıy qatty bas aýrýy, qol men arqadaǵy siresý jáne uıý belgilerinen zardap shekken.
«Bes jyl boıy aýyrsyný men jaısyzdyq sezindim, al operasııadan keıingi kelesi kúni-aq jeńildep qaldym», deıdi Natalıa.
Natalıa Kanadada 25 jyldan astam ýaqyt turyp keledi. Densaýlyǵy nasharlaǵan soń aqyly emdelý nusqalaryn izdep, ınternet arqyly Ulttyq neırohırýrgııa ortalyǵynyń saıtyn tapqan.
Ol buǵan deıin Qazaqstanda bolmaǵanyn jáne el týraly kóp bilmegenin atap ótti. Alaıda Ortalyq týraly aqparatpen tanysyp shyqqan soń, bul — zamanaýı ári bilikti medısınalyq uıym ekenine kóz jetkizgen.
«Operasııa eń joǵary deńgeıde ótti. Medısınalyq personaldyń kásibıligi men yqylasyna tántimin. Ulttyq neırohırýrgııa ortalyǵynyń dárigerlerine qamqorlyǵy men joǵary sapaly emi úshin alǵys bildiremin», dedi Natalıa.
Pasıent spınaldyq neırohırýrgııa bóliminiń jetekshisi, professor Talǵat Kerimbaevqa erekshe rızashylyǵyn bildirip, Ortalyq ujymyna órkendeý men tabysty jumys tiledi.
