Pýtın Nemsovtyń ólimine kináli adam týraly pikirin bildirdi

ASTANA. 21 naýryz. Reseı prezıdenti Vladımır Pýtın Borıs Nemsovtyń ólimine kináli adamnyń tabylatynyna úmitpen qaraıdy. Bul týraly rosbalt.ru habarlady. Ol Reseıdegi óndiris ıeleri men kásipkerlerdiń konferensııasynda «Nemsovty óltirýge tapsyrys bergen adam tabyla ma?», degen suraqqa «Men buǵan úmitpen qaraımyn», dep jaýap berdi. Osyǵan deıin Pýtın Reseı Ishki ister mınıstrliginiń alqa májilisinde saıasatkerdiń ólimine qatysty óz pikirin bildirgen edi. «Bizge Reseıdi osyndaı shekten shyqqan qylmystardan tazartý kerek», degen prezıdent quqyq qorǵaý organdaryn mundaı qylmystardy ashý úshin jumys sapasyn arttyrýǵa shaqyrdy. Vladımır Pýtın qylmyskerdiń tabylatynyna úmitpen qaraǵanymen, reseılikterdiń basym bóligi Nemsovti óltirtken adamnyń ustalatynyna senbeıdi. «Levada» ortalyǵy júrgizgen saýalnamada jaýap berýshilerdiń 33 paıyzy senimmen qarasa, 44 paıyzy qarama-qaıshy pikir bildirgen. Tipti 48 paıyzy tabylǵan kúnniń ózinde qylmystyń naqty sebebiniń anyqtalatynyna senbeıdi. Elaman Qońyr. Derek: rosbalt.ru. Sýret: tsn.ua.