– Memleket basshysy Qasym-Jomart Toqaevtyń Jarlyǵymen joǵary dárejeli erekshelik belgisi – «Qazaqstannyń Eńbek Eri» ataǵyna ıe bolýym aýyl sharýashylyǵy salasyn óristetý baǵytynda ter tógip júrgen barsha azamatqa kórsetilgen qurmet dep bilemin. Sanaly ǵumyrymnyń 55 jylyn aýyl sharýashylyǵyna arnap, elimniń órkendeýine óz úlesimdi qosyp kelemin. Bizdiń «Stepnoe» JShS eldegi agroónerkásiptik keshenin damytyp, qaıta óńdeý, mal sharýashylyǵyn damytýda jańa tehnologııany engizdik. Naýbaıhanada pisirilgen nan ónimderi óńir halqynyń 35–40%-yn qamtamasyz etedi. Birneshe mekteptiń oqýshylary bizdiń kompanııanyń qarjylandyrýymen ystyq tamaqpen qamtylady.
Halyqtyń 37 paıyzy aýylda turatyndyqtan, aýyl sharýashylyǵy salasyn damytýdyń startegııalyq mańyzy zor. Prezıdent forýmda elimizdiń jahandyq azyq-túlik qaýipsizdigi reıtınginde aldyńǵy lekte turǵany úlken jetistik ekenin atap ótti. Dese de buǵan toqmeıilsip otyra berýge bolmaıtynyn eskertken Memleket basshysy agroónerkásiptik keshendi kúsheıtýdiń mańyzy joǵary ekenine toqtaldy. Jer-ana eńbek etken adamnyń terin óteýsiz qaldyrmaıtynyn umytpasaq ıgi.
Gúlnar Ábdiramanova,
saýynshy, «Eren eńbegi úshin» medaliniń ıegeri:
– Memleket basshysy qarapaıym eńbegimizdi baǵalap, óz qolymen marapattaǵany úlken qýanysh. Bul mereıli is-shara meni ǵana emes, búkil aýdan halqyn qýantty desem, artyq aıtqandyq emes. Men aýdandaǵy «Sharkul food» JShS sharýashylyǵynda saýynshymyn. Sharýashylyqta 500-ge tarta saýyn sıyr bar. Kúndelikti 10 tonnadan astam sút saýylady. Bizdiń sharýashylyq zamanaýı jabdyqtarmen tolyq jaraqtanǵan. Jumys isteýge qolaıly orta qalyptasqan, qyzmetkerlerge ne qajettiń bári qarastyrylǵan.
Prezıdent Qasym-Jomart Toqaevtyń bastamasymen qarapaıym eńbek adamdarynyń mereıi ústem bolyp, joǵary deńgeıde marapattalyp jatýy zor mártebe. Men sııaqty qanshama eńbekkerdiń qulshynysy oıanyp, el degende jumyla eńbek etýge ynta-yqylasy aýyp otyr.
Osy turǵyda elimizde sharýashylyqtardy damytyp, eńbek ónimdiligin arttyrýǵa múmkindik jasap otyrǵan Prezıdentke, jaýapty tulǵalarǵa alǵysymyz sheksiz.
Altynbek Abatov,
«Kóksý qant zaýyty» JShS dırektory,
Qazaqstannyń agrarlyq salasynyń eńbek sińirgen qaıratkeri:
– Memleket basshysynyń Jarlyǵymen qurmetke bólengenime qýanyshtymyn. «Qazaqstannyń agrarlyq salasynyń eńbek sińirgen qaıratkeri» degen ataqty bıyl tuńǵysh ret berilip otyr. Jetisý oblysyndaǵy «Kóksý qant zaýytynyń» irgesi 1934 jyly qalanǵan. Ǵasyrǵa jýyq tarıhy bar óndiris ornynda eńbek etetin 500-ge jýyq áriptesimniń de eńbegi orasan dep bilemin. Elimiz táýelsizdigin alǵan jyldar ishinde de zaýyt óńirdi qantpen qamtamasyz etip keledi. Qazir bizdiń zaýytta qant qyzylshasyn dıqandardan qabyldaý naýqany qarqyndy júrip jatyr. Ázirge 130 myń tonna ónim qabyldap, onyń 80 myń tonnasyn óńdedik. Josparǵa saı bıyl 235 myń tonnaǵa deıin qant qyzylshasyn jınap, óńdeýdi kózdep otyrmyz. Jetisý oblysy sharýalarynyń ónimderinen óńdelip óndirilgen qant elimizdiń ár óńirine de jóneltiledi. Búginde zaýyttyń aýqymyn keńeıtý jumysynyń alǵashqy kezeńi bastaldy. Zamanaýı tehnologııamen jabdyqtalyp, irgesi keńigende jyl saıynǵy óndiretin qant óniminiń kólemi artady. Jańa jumys oryndary da ashylady. Aýyl sharýashylyǵy salasyna qoldaý artqan saıyn eńbekkerlerdiń de isi ilgeri basady.
Serik Dúısenbaev,
eńbek ardageri, «Parasat» ordeniniń ıegeri:
– Agroforýmda marapattalǵandardyń 80 paıyzy – aýyl sharýashylyǵy salasyndaǵy mamandar. Onyń da kópshiligi qarapaıym mehanızatorlar men malshy, eginshi qaýymy. Daladaǵy eńbekkerler jumysy shyn baǵalana bastady. Keıingi eki-úsh jylda dıqandardyń mol ónim alýyna toqtalsaq, salaǵa zamanaýı tehnologııa engizilip, ár tamshy sý aqylmen jumsalyp jatyr. Qyzylorda dıqandary jerdi lazerlik tegisteýmen óńdep, mol ónimge qol jetkize bastady. Eginshiler ozyq tehnologııany jyldam meńgerip, el qambasyn molaıtyp otyr. Taǵy bir qýanarlyq jaǵdaı, Prezıdent osy forýmda mal sharýashylyǵyndaǵy sýbsıdııa men jeńil nesıe isine arnaıy toqtalyp, tıisti memlekettik vedomstvolarǵa tapsyrma berdi. Buǵan qosa saladaǵy san alýan sharýany sıfrlandyryp, jasandy ıntellekt jetistikterin batyl engizýdi tapsyrdy.
Rasynda, kózin tapsa aýyl qalany taza azyq-túlikpen qamtamasyz etýge tolyq qabiletti. Oǵan shúbámiz bolmaýǵa tıis. Qazirde aýyl adamdary boıkúıezdik pen jalqaýlyqqa jol bermese, zamanynyń baı-baqýat azamaty bolýyna múmkindik kóp.
Nurtaza BERDIEVA,
Atyraý oblysy «Shoqpartoǵaı» aýyl sharýashylyǵy kooperatıviniń saýynshysy, III dárejeli «Eńbek dańqy» ordeniniń ıegeri:
– Atyraý oblysyndaǵy Shoqpartoǵaı aýylynda 2000 jyldan beri túıe saýamyz. Bes balamyz bar. Qazir bala-shaǵamyz eseıip, kásipke qolǵabys etedi. Eki kelinimiz de tań atar-atpastan bizben túıe saýýǵa shyǵady. Kúıeýim ekeýmiz otaý quryp, eńbekke endi aralasa bastaǵanda jumys qazirgiden de qaýyrt edi. Bir ózim 50 túıe saýyp júrgen kezder boldy. Bir adamǵa bul aýyr, mashaqaty kóp jumys bolǵan soń, tańǵy 3.00-de turyp iske kirisetinbiz. Otaǵasy da ár kez qoldaý kórsetip, qolǵabys etýden tanǵan emes. Qazir de bir ózim 30-35 túıeni saýyp júrmin. Eńbek adamdy eseıtedi, shıratady. Naryqta jaqsy ashytylǵan, sapaly shubatqa burynnan suranys bar, bola da beredi dep oılaımyn. Ásirese koronavırýs pandemııasynda taza ónimge suranys artty. Qazir ónimimizdi irgedegi Qulsary qalasynda ótetin jármeńkege shyǵaramyz. Úıden de alyp ketip jatady. Tipti ózim kólikke otyryp alyp, ortalyqqa da jetkizemin, bazarǵa da aparamyz. Aýyldaǵy uzaq jyl eńbegimizdi elep jatqan Memleket basshysyna alǵysymyz zor.
Tursynbaı Sadýaqasov,
Qostanaı oblysy «Úıkesken» JShS dırektory,
III dárejeli «Eńbek dańqy» ordeniniń ıegeri:
– Qostanaı oblysyndaǵy Úıkesken aýylynyń baýyrynda týyp, kıeli mekende óstik. Shuraıly jerdiń yrzyq-nesibesin kórip jatyrmyz. Bıdaı egemiz. О́kinishke qaraı, osydan bes jyl buryn el-jurt tegis basqa óńirlerge qonys aýdarǵan soń, aýylymyz qysqaryp ketti. Qazir 40 jumysshymyz Uzynkól aýdanynan qatynaıdy. Qoldan kelgenshe aýdandy damytýǵa septesetin bastamalardy qoldap, aǵaıynǵa kómek qolyn sozýdan qashpaımyz. 2003 jyly seriktestik qurylǵaly salada taban aýdarmaı eńbek etip kelemiz. 22 jyl degenińiz zýlap óte shyǵypty. Odan aýdan túrlendi, zaman ózgerdi. Degenmen, aýdandaǵy eńbekqor qaýymnyń nıet-tilegi sol qalpy ózgerissiz qaldy. 2014 jyldan beri «Elsan agro» seriktesigin basqaramyn. Sol aralyqtan berige deıin aýylsharýashylyq baǵytyndaǵy jerimiz 9 myń gektarǵa ulǵaıdy. О́zimizdiń kúndelikti atqaryp jatqan eńbegimizdi Memleket basshysy baǵalap jatqanyna qýanyshtymyz. Bul rasynda meniń ǵana emes, sharýashylyqta eńbek etetin barlyq jumysshynyń eńbegi, mańdaı teri dep bilemin.
