Belarýstik strımer jáne ınflıýenser Mellstroy (shyn aty – Andreı Býrım) orys tildi ınternet keńistiginde daýly, ushqary kontentimen tanylǵan. 2017 jyly Twitch pen YouTube platformalarynda oıyn strımderinen bastaǵan ol keıin «trash-strım» formatyndaǵy tikeleı efırlerge kóship, aýdıtorııasyn jyldam ulǵaıtqan. Onyń jazylýshylary – negizinen TMD jastary.
Resmı derekterge sáıkes, Andreı Aleksandrovıch Býrımge qatysty izdeý isi 15 qarashada Astanada tirkelgen. Izdeý sharalaryn bas qalanyń ekonomıkalyq tergep-tekserý departamenti júrgizip jatyr.
«Onlaın-kazınony jarnamalaý maqsatynda bloger túrli rozygryshtar men chellendjder jarııalaǵan.
Qatysýshylarǵa TikTok, YouTube Shorts jáne ózge de áleýmettik jelilerde Mellstroy.game brendi, kazıno logotıpteri jáne saıtqa siltemeler kórsetilgen vıdeorolıkter túsirý usynylǵan.
Buǵan deıin Býrım tikeleı efır kezinde adamdy urǵany úshin Reseı Federasııasynda túzeý jumystaryna mindettelip, aıyppul arqalaǵan», delingen Qarjylyq monıtorıng agenttiginiń habarlamasynda.
