Foto: Jasandy ıntellekt jáne sıfrlyq damý mınıstrligi
Bul jańa bilim berý bastamasy memlekettik jáne korporatıvtik deńgeıdegi sıfrlyq sheshimderdiń arhıtektýralyq sapasyn arttyrýǵa baǵyttalǵan.
Jedel sıfrlandyrý men jasandy ıntellektti keńinen engizý jaǵdaıynda negizgi kúrdeli máselelerdiń biri – IT-júıelerdiń bytyrańqylyǵy men olardyń qaıtalanýy bolyp qalyp otyr. Búginde memlekettik sıfrlyq servısterdiń yńǵaıly, ózara yqpaldasqan jáne aýqymdalatyn bolýy asa mańyzdy. Mundaı sheshimder daıyn modýlderdi qaıta paıdalaný, tehnologııalyq úılesimdilik jáne biryńǵaı arhıtektýra qaǵıdattaryna súıenýi tıis.
IT-arhıtektorlar akademııasy mamandardy IT júıelerin ıdeıadan bastap iske qosý men jasandy ıntellektini ıntegrasııalaýǵa deıin tutas ekojúıe retinde qarastyrýǵa úıretetin tájirıbege baǵyttalǵan platforma bolmaq. Oqý baǵdarlamasy tórt negizgi modýlden turady:
- Bıznes-prosesterdi qaıta qurý (reınjınırıng);
- IT-arhıtektýrany jobalaý;
- Jasandy ıntellekt: nólden prototıpke deıin;
- Jobalyq basqarý tásilderi arqyly jobalardy tıimdi iske asyrý jáne bıznes-nátıjelerge qol jetkizý.
Baǵdarlama bıyl jeltoqsan aıynda bastalady. Alǵashqy top tyńdaýshylary úshin oqý aqysyz. О́tinimder 2025 jylǵy 20 qarasha men 15 jeltoqsan aralyǵynda govtec.kz saıtynda qabyldanady.
«IT-arhıtektorlar akademııasynyń qurylýy – sıfrlyq sheshimderdiń sapasyn arttyrýǵa jasalǵan mańyzdy ınvestısııa. Biz azamattardyń qajettilikterine negizdelgen, biryńǵaı arhıtektýra talaptaryna saı keletin servısterdi jobalaı alatyn jańa býyn mamandaryn daıarlaımyz. Búginde sıfrlyq transformasııa tek tehnologııalarmen emes, júıeli oılaý men klıentke baǵdarlanǵan mádenıetpen ólshenedi», dedi Sıfrlyq úkimetti qoldaý ortalyǵynyń bas dırektory Bahtııar Muhametqalıev.
2025 jyldyń tamyz aıynda Sıfrlyq úkimetti qoldaý ortasynyń bastamasymen barlyq ortalyq memlekettik organdardy, jergilikti atqarýshy organdardy, sondaı-aq «Samuryq-Qazyna» jáne «Báıterek» sııaqty kvazımemlekettik sektor uıymdaryn qamtıtyn Arhıtektýralyq keńes quryldy.
Aıta ketelik, Sıfrlyq úkimetti qoldaý ortalyǵy (SÚQO) – Qazaqstandaǵy sıfrlyq arhıtektýrany qalyptastyratyn, keń aýqymdy jasandy ıntellekt jobalaryn júzege asyratyn taldamalyq jáne jobalyq ortalyq. Premer-Mınıstr tóraǵalyq etetin Sıfrlyq shtabtyń jumys organy bolyp tabylady.
