Foto: Oqu-agartu ministrligi
Elimizde balalar halyqtyń úshten birin – 34 paıyzyn quraıdy, ári bul kórsetkish jyldan-jylǵa turaqty ósip keledi.
Memlekettik saıasattaǵy basym baǵyttardyń biri – balalarǵa uzaq merzimdi qarjylyq qoldaý kórsetý. Qazaqstan – tabıǵı resýrstardan túsetin tabystyń bir bóligin tikeleı balalardyń ıgiligine baǵyttaıtyn sırek elderdiń biri. 2024 jyldan bastap «Ulttyq qor – balalarǵa» baǵdarlamasy aıasynda qordyń ınvestısııalyq tabysynyń 50 paıyzy kámeletke tolmaǵan azamattardyń jeke jınaq shottaryna aýdarylyp keledi. 2025 jyly ár balaǵa shamamen 130 AQSh dollary kóleminde qarajat bólinip, 324 myńnan astam balany qamtyǵan. Eki jyl ishinde bir balaǵa shaqqanda jınalǵan ortasha soma 233 AQSh dollaryn qurady.
Oqý-aǵartý mınıstrliginiń málimetinshe, 2023 jyldan bastap barlyq bastaýysh synyp oqýshylary 100% tegin ystyq tamaqpen qamtylyp, 1,7 mıllıonnan astam balany qamtyǵan jáne balabaqshalarda 953 myń tárbıelenýshi tegin tamaqpen (bıýdjetterden 207,4 mıllıard teńge bólindi) qamtamasyz etildi.
IýNISEF júrgizgen 2024 jylǵy MICS zertteýiniń nátıjeleri boıynsha, Qazaqstandaǵy balalardyń tamaqtaný kórsetkishteri Eýropa men Ortalyq Azııa elderiniń deńgeıine saı keledi. Sarapshylar bul kórsetkishterdiń turaqtylyǵyn jáne kúrt aýytqýlardyń bolmaýyn erekshe atap ótti.
Balalardyń qaýipsizdigin qamtamasyz etý maqsatynda elimizde zańnamalyq baza da nyǵaıtyldy.
«Zań balany tolyq qorǵaýy tıis. Biz bul qorǵaý shynaıy ári tıimdi jumys isteýi úshin naqty sharalar qabyldap jatyrmyz. Árbir bala memleketten teń múmkindik pen senimdi qoldaý alýy kerek. О́ıtkeni bul – elimizdiń bolashaǵyn qalyptastyratyn berik negiz», dedi Oqý-aǵartý mınıstrligine qarasty Balalardyń quqyqtaryn qorǵaý komıtetiniń tóraǵasy Nasymjan Ospanova.
2026 jyldan bastap elimizde balalardy qoldaý men damytýǵa baǵyttalǵan barlyq sharalardy biriktiretin «Qazaqstan balalary» atty biryńǵaı ulttyq baǵdarlama iske qosylady. Bul baǵdarlama balanyń ómirlik jolynyń barlyq kezeńin qamtıtyn keshendi ulttyq strategııaǵa aınalmaq.
