Gennadıı Golovkın – Halyqaralyq boks federasııasyn basqarady

Gennadıı Golovkın Halyq­aralyq boks federasııasynyń pre­zıdenti bolyp saılansa, tek qazaq boksy ǵana emes, álemde osy sport túriniń órken jaıýyna zor eńbek sińiretinin gazetimizdiń ótken nómirinde jazǵan edik.

Rım qalasynda ótken Kon­greste otan­dasymyz halyq­aralyq federasııanyń prezıdenti laýazymyna úsh jyl mer­zimge saılandy.

«Men bokstyń barlyq ótke­linen óttim, áýesqoılar arasynda Olımpıada dodasyna qatysyp, kúmis medal ıelendim, álem chempıony atandym. Al búginde sport salasynda jaýapkershilik arqalap, basshylyq qyzmet atqaryp kelemin. Bala kúnimnen júregimmen qalaǵan, kóńilim erekshe qulaǵan sporttyń bolashaǵy úshin Halyqaralyq boks federasııasyna úlesimdi qosyp eńbek etýge keldim. Buǵan deıin Halyqaralyq Olımpıadalyq komıteti (HOK) Olympism365 komıssııasynyń múshesi retinde, sonymen qatar «World Boxing» uıymynyń Olımpıadalyq komıs­sııasynyń tóraǵasy laýazymyn atqarǵanda ańǵarǵanym, ádil basshylyq etý – boksty, boks­shylardy qorǵaıtyn qalqan. Biz búgin tarıhı mańyzdy jıynǵa jınaldyq. Halyqaralyq boks federasııasy boksshylardyń seni­min kúsheıtetin, Olımpıadalyq qaýymdastyq sanasyp, qurmet­teıtin uıymǵa aınalýy qajet»,  dedi G.Golovkın.

Halyqaralyq uıym­nyń eki tizgin, bir shylbyryn qolyna alǵan jer­lesimiz boksty damytýda ádi­let­tilik ornatyp, bura tartýshy­lyq­qa jol bermeý­ge kúsh salaty­ny­na toqtaldy. HOK-tiń barlyq qun­dylyǵyna qurmet­pen qarap, ádildik orna­týǵa baryn salatynyn, zor jaýap­­kershilik júktep, se­nim art­­qan kópshilikke alǵysyn aıtty.

Halyqaralyq boks federa­sııasynyń kongresinde uıymnyń ózge de basqarý organdarynyń jaýapty tulǵalary saılandy. Federasııanyń reglamentinde qattalǵan túıtkildi máseleler, kúntizbedegi halyqaralyq aýqym­­dy sharalar, uıymdy da­my­tý­dyń ózekti taqyryptary talqy­landy. Jarǵyǵa saı qabyl­dan­ǵan sheshimder delegat­tardyń daýys berýi arqyly bekitildi. Kon­gres­te daýys berýge 58 eldiń boks federasııalarynyń ókilderi qatysty.

2023 jyly sáýirde qurylǵan «World Boxing» uıymynyń kózdegeni – boksty jazǵy Olım­pııa oıyndarynyń baǵdar­lamasyndaǵy ornyn saqtap, bola­shaǵyn bekemdeý. Áıtpese HOK 2022 jyly bekitken Olımpadalyq sport túrleriniń tizimine boks­ty qospaı qoıdy. Kiltıpan halyqaralyq boks qaýymdastyǵy (IBA) tarapynan týyndady. 2019 jyldyń jazynda Halyqara­lyq boks qaýymdastyǵynyń ishin­de tutanyp, jemqorlyq máselesi ýshyqqanda, HOK bul qaýymdastyqpen jumys isteýdi toqtatty. 2023 jyly maýsymda Halyqaralyq olımpıada komı­teti bul uıymdy moıyn­daýdan túp­kilikti bas tartyp, irgesin aýlaq saldy. Munyń salqyny aldymen boksqa tıip, 2028 jyly AQSh-tyń Los-Andje­les qalasynda ótetin  Olımpııa oıyndarynan tys qalýy da múmkin edi. Byltyrǵy Parıj Olımpıadasynda boks dodasyn HOK arnaıy jumys tobyn quryp, solardyń basqarýyna berip ótkizdi.

Boks sporty Olım­pıada baǵ­darlamasymen birge jasaı berýi úshin HOK jańa uıym qurý qajettigin eskertti. Kóp ótpeı 2023 jyldyń kókteminde «World Boxing» uıymy qurylyp, jer-jahanǵa saýyn aıtyldy. Alaıda halyqaralyq boks federasııasy jumysyna sol jyldyń kúzinde kiristi. Germanııanyń Frankfýrt qalasynda alǵashqy kongresin ótkizip, prezıdenti, komıtet basshylary saılandy. Keleshekte atqarylar ju­mysy jazylyp, jarǵysy bekitildi. Tuńǵysh prezıdenti bo­lyp saılanǵan nıderlandyq Bo­rıs van der Vorspen qanattasa Raıan O’Shı (Kanada), Mett Holt (Anglııa), Dına Glıkıdıs (Aýstralııa) vıse-prezıdent bolyp eńbek etti. Shtab-páteri Shveısarııanyń Lozanna qalasyndaǵy uıymnyń bedelin arttyrý jańa komandaǵa syn. Búginde uıymǵa 136 eldiń boks federasııasy múshe.

Otandasymyz álemdik uıym­­nyń prezıdenti bolyp saı­lanǵanyn jahandyq aqparat quraldary da súıinshileı jarysa jazyp jatyr. VVS, Reuters agent­tikteri Golovkın halyqaralyq boks uıymynyń prezıdenti bolyp saılanǵanyn, jańa prezıdenttiń jankúıerlerdiń boks sportyna degen ińkárligin kúsheıtip, senimin arttyrýǵa kúsh salamyn degen pikirin jarııalady.

«World Boxing» uıymynyń bıylǵy kongresine tóraǵalyq etken halyqaralyq boks fede­rasııasynyń vıse-prezıdenti Dına Glıkıdıs bolashaqta atqa­rylar jumysqa qatysty keleli máseleler aıtylǵanyn atap ótti. «Kongress – «World Boxing» uıymynyń eń joǵary bılik organy sanalady. Osyndaı alqaly basqosýda boksty óris­tetýdiń túıtkildi máseleleri talqylanyp, sheshimi aıtylady. Qurylǵanyna eki jyl bolǵan uıym birqatar tabysqa jetti. Biz árqashan ashyqtyq pen qatań basqarý qaǵıdasyna súıenip, óz mindetin laıyqty atqarýǵa umtylamyz. Jańa saılanǵan prezıdent G.Golovkın atqarýshy keńespen tize qosyp, 2028 jyly ótetin Olımpıada dodasyna ázirlikti kúsheıte túsetinimizge senimdimin», dedi D.Glıkıdıs.

Bokstan ulttyq quramanyń bas bapkeri qyzmetin atqarǵan bilikti maman Tursynǵalı Edilov Gennadıı Golovkınniń halyqaralyq uıymǵa jetekshilik etýi qazaq sportynyń bedeli joǵary ekenin aıqyndaı túsedi deıdi.

«Bárimiz úshin de bul aqjol­taı jańalyq boldy. Qazaq boksynyń jańa dáýiri týady dep senemin. Genany 2000 jyldary jastar sapyna ótken shaǵynan jaqsy bilemin, óte izdenimpaz, eńbekqor azamat. Áýesqoılar arasynda, keıin kásipqoı boksqa aýysqanda da elimizdiń abyroıyn asqaqtatty. Al búginde álemdik tulǵaǵa aınalyp, dúnıejúziniń boksyna bas ıe bolyp saılandy. Endi bizdiń boksshylarǵa, bapkerlerge de jaýapkershilik joǵarylaıdy dep senemin. О́ıtkeni qazaq boksy álemde teńdessiz ekenin dáleldeý bar da, sol bıikten tómendemeý de olarǵa sert. Boks degen bekzada sporttyń dárejesin kóterip, mereıin asyrýǵa jerlesimiz zor úles qosatynyna senimdimin»,  deıdi T.Edilov.

Olımpıadanyń baǵ­darlama­synda boks sporty ornyn nyǵaıta túsýine jańa ujym kúsh salady dep álem senip artyp otyr.

Rımdegi kongreste Halyq­aralyq boks federasııasynyń vıse-prezıdenti bolyp Dına Glıkıdıspen ózge kanadalyq Raıan O Shı, brıtandyq Mett Holt saılan­dy. Uıymnyń atqarýshy keńe­sine Maıkl Mıýller (Ger­ma­nııa), Vıktorıko Vargas (Fılıp­pın), Tasýıa Nakama (Ja­ponııa), Markos Kandıdo de Brıto (Bra­zılııa) bekitildi.