Sáken Seıfýllın atyndaǵy Qazaq agrotehnıkalyq zertteý ýnıversıtetinde ótken kezekti «Astana – esirtkisiz qala» aksııasyna quqyq qorǵaý organdarynyń qyzmetkerlerimen qatar tanymal sportshylar, medıa tulǵalar men dárigerler de qatysty.
«Zań jáne tártip» qaǵıdaty aıasynda uıymdastyrylǵan aksııada kásipqoı boksshy Angelına Lýkas, aýyr atletıka sheberi Ilıa Ilın, MMA jaýyngeri Vasılıı Tahtaı, kıokýshınkaı jáne karateden álem chempıony Nursultan Álıaqbarov, bloger Álibek Ermaǵambetov taqyrypqa qatysty túıgenderin ortaǵa saldy. Qonaqtardyń esirtki tutyný men onyń saýdasyna úles qosýdyń saldary týraly keleli kózqarastary jınalǵan jastardyń sanasyn serpiltip, qatege boı aldyrmaýǵa úndedi.
О́z kezeginde Ilıa Ilın teris jolǵa túspeýdiń tıimdi joly ózińdi damytý, izdený ekenin atap ótti.
«Men jastardy bilim alýǵa shaqyramyn. О́zin damytýǵa umtylǵan urpaq, aldynda maqsaty bar azamat eshqashan qoǵamǵa zııan keltiretin joldy tańdamaıdy. Esirtki tutyný men saýdalaýǵa aıaq baspaıdy. Búgin men júrip ótken jolym arqyly qandaı jaǵdaıda da ózin joǵaltpaýdyń syrymen bólistim. Osy esirtkige qarsy júrgizgen úgit-nasıhatymyz bolashaqta jemisin beretinine senemin», dedi Ilıa Ilın.
IIM ókilderi osy jyldyń mamyryna deıin elimizde 1 445 esirtkige baılanysty qylmystyq is tirkelip, onyń 276-sy Astanaǵa tıesili ekenin jetkizdi. Sondyqtan bilim men jumys izdep bas qalaǵa aǵylatyn jastarmen jıi júzdesip, esirtkiniń densaýlyqqa tıgizetin zııany men zań sheńberindegi jazasyn jete túsindirý – árqashan ózekti.
«Búgin salamatty qoǵamnyń negizine balanatyn jastar aldynda arnaıy jedel áreket etý jasaǵynyń (SOBR) jaýyngerleri el arasynda «zakladchık» atalyp ketkenderdiń izin kesý, esirtki jasyrylǵan oryndardy izdep, tabý baǵytynda jasalatyn qyraǵy qadamdaryn naqty kórsetti. Osyndaı júıeli áreketterdiń arqasynda qylmys búgin nemese erteń ashylatynyn jastar ańdamaı jatady. Sondyqtan osy iske barýdyń saldaryn kóz aldarynda kórsettik. Aldymen ózin, ata-anasyn oılaıtyn sanaly jas esirtkige áýestenbeýi kerek», dep túsindirdi polısııa podpolkovnıgi, esirtki qylmysyna qarsy kúres basqarmasynyń qyzmetkeri Damır Baıbazarov.
Ǵasyr dertine balanǵan esirtkiniń qaýip-qaterin túsinetin jastar da az emes. Olar esirtkige qarsy kúres sharalaryna shama-sharqynsha qoldaý kórsetip keledi. Máselen, «Astana jastary» uıymynyń belsendileri IIM mamandarymen birlesip, 2 500-den astam esirtki jarnamasy salynǵan graffıtıdiń joıylýyna septesken.
Aksııa aıasynda qalalyq psıhıkalyq densaýlyq ortalyǵynyń dáriger-narkologtary R.Moldahmetova men N.Omarova esirtki tutynýdyń densaýlyqqa, adam ómirine keltiretin keri saldaryn jete túsindirdi.
Aýqymdy jıyn sońynda polısııa podpolkovnıgi D.Baıbazarov stýdentter arasynda esirtkiniń zańsyz aınalymyna qarsy kúres isine qatysty ınteraktıvti saýalnama júrgizdi. Stýdentter atalǵan saýalnama arqyly bilgenin shegelep, zańnamaǵa qatysty mańyzdy málimetterge qanyqty.
