Konferensııada sıfrlyq gýmanıtarıstıka baǵytyndaǵy zertteýlerge basymdyq berildi. Is-sharanyń resmı ashylýynda Qazaqstan Respýblıkasynyń Ulttyq ınjenerlik akademııasynyń korrespondent-múshesi, tehnıka ǵylymdarynyń kandıdaty, qaýymdastyrylǵan professor Darhan Aqpanbetov baıandama jasap, sıfrlyq qoǵam jaǵdaıynda bilim berý men ǵylymnyń jańa mindetterine toqtaldy. Ol qazirgi kezeńde JI tehnologııalary tek ınjenerlik nemese tehnıkalyq salalarǵa ǵana emes, tarıhı zertteýler, til saıasaty, mádenı murany saqtaý sııaqty gýmanıtarlyq baǵyttarǵa da túbegeıli ózgeris ákelip otyrǵanyn atap ótti.
UǴA akademıgi, professor Maqtaǵalı Bektemisov jasandy ıntellekt negizinde júzege asatyn ǵylymı derekterdi qurylymdaý, oqý sapasyn avtomatty baǵalaý jáne zertteý prosesterin ońtaılandyrý máselelerin kóterip, bilim berý júıesindegi sıfrlyq transformasııanyń artyqshylyqtaryn túsindirdi.
Is-sharada otandyq jáne sheteldik ǵalymdar taqyrypqa qatysty san qyrly baıandama jasap, óz paıymdaryn ortaǵa saldy. Atap aıtqanda, Pákistandyq Sukkur IBA University zertteýshisi Zafarýllah Sahıto ınjenerlik bilim berýdi kóptildi ortada damytýdyń ǵylymı negizderin usynyp, STEAM modeline tildik komponentti engizýdiń mańyzyn kórsetti. Kazakh-American University prezıdenti, akademık Asylbek Isahov jasandy ıntellekttiń qoǵamnyń qundylyq júıesine áseri týraly tereń taldaý jasap, algorıtmdik ádilettilik pen sıfrlyq etıkanyń eleýli máselelerin kóterdi.
Baýyrlas ózbek elinen kelgen Samarqand memlekettik ýnıversıtetiniń professory Bahtııar Ergashev Túrkistan general-gýbernatorlyǵy qujattaryn sıfrlyq derektaný ádisterimen taldaýdyń jańa nátıjelerin usyndy.
Sondaı-aq, professor Jomart Sımtıkov gýmanıtarlyq ǵylymdardyń sıfrlyq ortada evolıýsııasyn sıpattaı otyryp, jańa ádisnamalyq tásilderge júginýdi alǵa tartsa, MITÝ professory Altynaı Abýova taǵam óndirisindegi ınnovasııalyq sheshimderge arnalǵan zertteý nátıjelerin usyna otyryp, JI tehnologııalarynyń óndiris salasyndaǵy tıimdiligin dáleldedi. Túrkııalyq zertteýshi Ibrahım Kalqan qazaq shejiresin sıfrlyq formatta rekonstrýksııalaý boıynsha jańa ádisterdi kórsetip, genealogııalyq zertteýlerdiń keleshegin keńeıtý máselesine toqtaldy.
Konferensııa barysynda tarıh jáne mádenı mura baǵytynda arhıvtik materıaldardy sıfrlandyrý, tarıhı derekterdi JI arqyly taldaý, vırtýaldy mýzeıler qurý máseleleri qaraldy. Kóptildi bilim berý, sıfrlyq lıngvıstıka jáne tildik kontentti avtomattandyrý, jasandy ıntellektiń ekonomıka, tehnologııa jáne qoǵamdaǵy ornyqty damý prosesterine áseri keńinen zertteldi.
Forým qorytyndysynda sıfrlyq gýmanıtarıstıkanyń bolashaǵy men JI tehnologııalaryn ǵylymı prosesterge ıntegrasııalaý jóninde jańa ǵylymı tujyrymdar jasaldy.
