Rýslan Japarov «Shyǵys» kenishinde 2012 jyldan beri eńbek etedi. Bastapqyda qoıma sharýashylyǵy ýchaskesinde mataýshy bolyp jumys istedi. 2014 jyldan beri tehnologııalyq keshen ýchaskesinde. Kenishke jumysqa kirgenine 13 jyl bolǵan, sonyń 11 jyly osy ýchaskede ótip keledi.
Onyń qyzmettik mindeti – sıkldi-aǵyndy arshý kesheniniń jumysyn qamtamasyz etý. Qarapaıym tilmen aıtsaq, rotorly tehnıka óndirgennen keıin kótergish konveıer arqyly kelip túsken ónimdi jyljymaly lentamen qoımaǵa qattaýǵa jetkizý. Áriptesterimen birge osy úderisti qadaǵalap, jabdyqtarǵa qyzmet kórsetedi, tasymal úderisiniń úzilmeýi jolynda ter tógedi.
Jumys kúni konveıer jabdyqtarynyń jumysqa daıyndyǵyn, ıaǵnı tehnıkanyń paıdalaný nusqaýlyǵyna sáıkestigin tekserýden bastalady. Ár kenshiniń eńbek qaýipsizdigi, sondaı-aq jumys ornynyń eńbek, órt qaýipsizdigi talaptaryna saı bolýy da esten shyǵarýǵa bolmaıtyn mańyzdy másele. Tıisti aqparatty tapsyrý-qabyldaý jýrnalyna jazý jumysy bar. Osynyń bári qap-qara shań-tozańnyń ortasynda ótedi.
Konveıer ekiniń biri rýline otyra beretin jeńil kólik, tipti traktor da emes. Oǵan arnaıy bilim kerek. Tehnıkalyq sıpattamasyn, paıdalaný talaptaryn, aspaptar kórsetkishiniń mánin tolyǵymen bilý qajet. On jyldan asa ýaqyt Rýslan osy mindetti tııanaqty atqaryp keledi. Kásibine adaldyǵy men ujymyndaǵy tatýlyq, birlikti arttyrýǵa qosyp júrgen úlesi úshin kásiporyn basshylyǵy tarapynan túrli marapatqa ıe bolǵan.
Rýslannyń erekshe bir qyry – kenishtiń qoǵamdyq jumysynan syrt qalǵan emes. Jyl saıyn Naýryz meıramyndaǵy merekelik is-sharalardyń bel ortasynda júredi. Bıylǵy naýryzda da túngi aýysymnan shyqqanyna qaramastan qazaqy shapan, túlki tymaǵyn kıip, mereke kórigin qyzdyrdy. Kásipodaq uıymy uıymdastyrǵan asyq atý saıysynda birinshi oryndy jeńip aldy. Oǵan qosa Ekibastuz qalalyq asyq atý jarysynda da jeńimpaz atanyp, qazan aıynda Astana qalasynda «Qazaqmetal kasipodagy» taý-ken metallýrgııa salalyq kásipodaǵy ótkizgen «Eńbek atleti – 2025» saıysynan «Surmergen oıynshy» atalymymen oraldy.
– Kórshi-qolańmen de tatý-tátti turamyz. Jumystan bos kezde túrli is-sharany birlesip uıymdastyramyz. Naýryz meıramynda ózim turatyn kópqabatty úıdiń aýlasyna qazaqy úı tigilip, samaýyr qoıylyp, qazan kóteriledi. Kıiz úıde kórshiler Naýryz meıramynda ǵana emes, Ramazan aıynda da máre-sáre bolyp jıylyp, aýyzashar berisedi. Jıyndardan balalar da qalys qalmaı, túrli oıyn oınaıdy. Olarǵa ónege kórsetý – eresekterdiń mindeti, – deıdi ol.
Rýslan – kópbalaly áke. Bıyl Bilim-ınnovasııa lıseıin bitirgen tuńǵyshy Ádil IT mamandyǵy boıynsha memlekettik grantqa qol jetkizip, Astanada bilim alyp jatyr. Otaǵasy kómir qazyp, otbasyn asyraý qamymen júrgende jary Gúlmıra úıde bala tárbıesimen aınalysady. Berekeli otbasy «Shyǵys» kenishiniń basshylyǵy usynǵan turǵyn úı baǵdarlamasynyń ıgiligin kórip, balalary úsh bólmeli páterde asyr salyp ósip keledi.
Áńgime ústinde Rýslan arǵy atasy, Túrkistanda jerlengen Myrzaǵul batyrdyń basyna baryp zııarat etýge nıettenip júrgenin aıtty. Babasy el men jerdi jaýdan qorǵasa, bergi atalary da osal emes, árqaısysy eńbek batyry deýge turarlyq tulǵalar. О́z atasy Badash Japarov uzaq jyldar Baıanaýyl óńirinde shopan bolyp, mal sharýashylyǵyndaǵy adal eńbegimen aty shyqqan. Arǵy atasy Japar da óz zamanynyń ataqty qoıshysy bolǵan.
– Belgili jazýshy Ázilhan Nurshaıyqov atam Japardyń shańyraǵynda bolyp, dám tatyp, atam men ájem týraly óziniń «Alystaǵy aýdanda» atty ocherkinde jazyp ketken, – deıdi ol.
Dál qazir Rýslan alaı-dúleı jelmen uıytqyǵan shań astynda júr, kómir tozańynan júzi kórinbeıdi. Biz Rýslan sııaqty jankeshti jumysshylar qazyp jetkizgen kómirdiń arqasynda «Jyly úıde jut joq» dep, ystyq shaıdan urttap qoıyp, alańsyz otyrmyz.
Pavlodar oblysy,
Ekibastuz qalasy
