Sýretti túsirgender – A.Dúısenbaev, E.ÚKIBAEV
Kezdesýde Memleket basshysy Uıymnyń Qazaqstan shahmat federasııasyna, jattyqtyrýshylar men jas sportshylarǵa kórsetken qoldaýyn joǵary baǵalady.
Prezıdent elimizde shahmat sport túri ǵana emes, zııatkerlik mádenıettiń, tárbıe men bilimniń mańyzdy bóligi sanalatynyn atap ótti.
Memleket basshysy balalar men jastar arasynda shahmatqa qyzyǵýshylyqtyń artyp kele jatqanyna nazar aýdardy. Prezıdenttiń aıtýynsha, bilim berý júıesinde shahmat ınfraqurylymyn damytýǵa jáne ilgeriletýge basa mán berilip otyr.
Áńgimelesý barysynda ulttyq federasııanyń uıymmen jan-jaqty yntymaqtastyqty odan ári keńeıtý, sonyń ishinde iri halyqaralyq jarystar ótkizý men birlesken jobalardy iske asyrý máseleleri pysyqtaldy.
Arkadıı Dvorkovıch Qazaqstanda qabyldanǵan shahmatty damytýǵa arnalǵan keshendi jospardyń mańyzy týraly aıtty. Atalǵan qujat memleket, bıznes jáne ulttyq federasııanyń birlesip jumys isteýine jol ashady. Sondaı-aq byltyr qazaqstandyq shahmatshylar FIDE aıasynda ótken barlyq jarystan eń kóp medal jınaǵanyna nazar aýdardy.
Qasym-Jomart Toqaev Halyqaralyq shahmat federasııasynyń prezıdenti Arkadıı Dvorkovıchti Qazaqstandaǵy shahmatty órkendetýge qosqan úlesi úshin II dárejeli «Dostyq» ordenimen marapattady.
Sonymen qatar Memleket basshysy álem birinshilikterinde top jarǵan jas shahmatshylarmen kezdesti. Kezdesýge 8 jasqa deıingi sanatta álem chempıondary atanǵan Ádınur Ádilbek pen Alısha Bısalıeva, 12 jasqa deıingi sanatta álem chempıony bolǵan Danıs Qýandyquly, 14 jasqa deıingi sanatta álem birinshiliginde jeńis tuǵyrynan kóringen Mark Smırnov, 16 jasqa deıingi sanat boıynsha álem chempıonatynda altynnan alqa taqqan Edgar Mamedov, 16 jasqa deıingi shahmatshylar arasynda álem birinshiliginiń kúmis júldesine qol jetkizgen Saýat Nurǵalıev qatysty.
Memleket basshysynyń aıtýynsha, jas sportshylardyń jetistikteri halyqaralyq arenada elimizdiń mereıin ústem etedi ári elimizde shahmattyń keleshegi zor ekenin kórsetedi. Prezıdent chempıondardyń bıik maqsattarǵa umtylýy qajettigin jetkizip, olarǵa jarqyn jeńister tiledi.
– Shahmat degen úlken óner. Sondyqtan shahmatpen kúndelikti, muqııat, arnaıy kitaptardy oqı otyryp aınalysý qajet. Búgin Halyqaralyq shahmat federasııasynyń prezıdenti Arkadıı Dvorkovıchpen kezdesip otyrsyzdar. Bul – sizderdiń baqytty sátterińizdiń biri, – dedi Memleket basshysy.
Kezdesý sońynda Qasym-Jomart Toqaev shahmat taqtasyna estelik jazba qaldyrdy.
