«Mańǵystaý» vokzalynda bolashaq ǵımarattyń irgetasyn quıý aıaqtalyp, tireý qabyrǵalaryn armatýralaý, «Beıneý» vokzalynda jerasty qabatyn jabyn plıtalarymen jabý, bıiktigi 6 metr bolatyn birinshi qabattyń kolonnalaryn ornatý is-sharalary atqarylyp jatyr. «Shetpe» vokzalynda bolashaq ǵımarattyń irgetasyn quıý aıaqtalyp, jertóle qabyrǵalaryn montajdaý, kolonnalardy qalypqa keltirý, armatýralaý qolǵa alynǵan. «Qazaqstan temir joly» UK» AQ tapsyrysymen júzege asyp jatqan keshendi rekonstrýksııalaý elimizdiń týrıstik áleýetin arttyrýǵa baǵyttalyp otyr.
О́ńirde jol qurylysyna, qatysty sharýalar barynsha ózekti. О́ıtkeni ol – keleshegin týrızmmen baılanystyrǵan óńirdiń kúretamyry. Sol sebepti oblysta jol qurylysy jobalary jeterlik.
– Jetibaı – Jańaózen – Kendirli – Túrikmenstan shekarasy avtomobıl jolynyń 65–179 shaqyrym ýchaskesin ortasha jóndeý jumysy bıyl tamyz aıynda bastaldy. Budan bólek, osy joldyń 179–229 shaqyrym ýchaskesinde kúrdeli jóndeý jumysy bastalady, – dedi oblystyq jolaýshylar kóligi jáne avtomobıl joldary basqarmasynyń basshysy Beıneýbek Ábilov.
Sondaı-aq «Air Astana» áýe kompanııasy Saýd Arabııasynyń Djıdda, Medına qalalaryna tikeleı reısterdi iske qosqan. 2025 jyldyń 29 qarashasynan bastap «Fly Arystan» áýe kompanııasy Birikken Arab Ámirlikteriniń Dýbaı qalasyna aptasyna bir ret, senbi kúnderi tikeleı ushatyn reıs ashýdy josparlap otyr. Sonymen qatar bıyl Kólik mınıstrligi Azamattyq avıasııa komıtetiniń qoldaýymen Aqtaý – Kókshetaý, Aqtaý – Túrkistan áýe reısteri ashyldy. 2025 jyldyń 23 qyrkúıeginen Aqtaý – Qaraǵandy baǵytynda tikeleı áýe reısteri usha bastady.
Oblystyq jolaýshylar kóligi jáne avtomobıl joldary basqarmasynyń bas mamany Murat Asadýllaev Mańǵystaýda oblystyq mańyzy bar avtomobıl joly kezeń-kezeńimen jańartylyp jatqanyn aıtady. Mysaly Fort-Shevchenko – Aqtaý – Fort-Shevchenko baǵytyndaǵy avtojoldyń 30 shaqyrymyn rekonstrýksııalaý jumystary júrgizilip jatyr. Úsh kezeńge bólingen jobanyń birinshi kezeńinde joldyń 43–73 shaqyrymyn, ekinshi kezeńinde 73–104 shaqyrymyn rekonstrýksııalaý, úshinshi kezeńde 104–132 shaqyrymyn ortasha jóndeý jumysy júrgiziledi. Joba oblystyń kólik ınfraqurylymyn damytýǵa, óńir ishinde kólik qatynasynyń qaýipsizdigin arttyrýǵa baǵyttalǵan.
– Qazir avtomobıl jolynyń 17 shaqyrym aýmaǵynda asfaltbeton jabynynyń birinshi qabatyn tóseý jumystary aıaqtaldy. Sonymen qatar 6,7 shaqyrym jol aýmaǵynda joldyń tómengi qabaty men negizin daıyndaý júrgizilip jatyr. Qurylys-montaj jumysy bekitilgen óndiristik kestege sáıkes oryndaldy. Atqarylǵan sharýalardyń nátıjesinde joldyń sapasy jaqsaryp, kólik qatynasynyń qaýipsizdigi men qozǵalys jyldamdyǵy artty, – dedi M.Asadýllaev.
Jol jaılylyǵy – ekonomıkanyń ǵana emes, mádenıettiń de kórinisi. Sondyqtan joldy jaqsartý, jańǵyrtý – asa mańyzdy is.
Mańǵystaý oblysy
