Yandex Ads ókili Madına Seısenǵalıevanyń aıtýynsha, el turǵyndary jańa jyl qarsańynda «kimge ne syılaımyn, dastarqanǵa ne qoıamyn, qaıda baramyn» degen josparlar qurady.
Syılyq retinde servısterge jazylym óte tanymal. Jeltoqsanda oǵan suranys artady: ásirese mýltıjazylymdar, oıyndarǵa jazylymdar jáne Telegram Premium jıi tańdalady.
Balalar úshin jańa jyl – shyrsha toıy men erteńgilik. Sol sebepti ata-analar balalarǵa arnalǵan is-sharalardy qazannyń sońynan bastap izdeı bastaıdy. Al balalarǵa syılyq izdeý jeltoqsannyń ekinshi aptasynda eń joǵary deńgeıge jetedi.
Turǵyndar qysta ýaqytty qyzyqty ótkizý joldaryn da belsendi izdeıdi. Máselen, muz aıdyndaryna, boýlıngke, karaokege suranystar qatty ósedi.
Merekelik dastarqanǵa arnalǵan ónimderge de qyzyǵýshylyq kóbeıip, azyq-túlik pen daıyn tamaq jetkizýge suranys artady. Ásirese balyq, teńiz ónimderi, táttiler men et ónimderi kóp izdeledi.
Táttiler ishinde aq shokolad, karamel, kámpıtter, tátti nandar men vaflı eń tanymal. Sýsyndardan shaı, kofe jáne shyryndar jıi izdeledi.
Syılyq retinde adamdar kóbine elektronıka men turmystyq tehnıkany tańdaıdy. Bıyl 3D-prınterler, saýndbarlar, VR-kózildirikterge qyzyǵýshylyq artqan. Sondaı-aq aerogrıl, staıler jáne bý tazartqyshtar jıi satyp alynady.
Aqyldy gadjetterge suranys eki ese ósken. Ásirese «aqyldy» kolonkalar men teledıdarlar kóp qaralady.
Jańa jylda adamdar erekshe syılyq alǵysy keledi, biraq qymbat zatty tańdaýǵa kóp ýaqyt ketedi. Kópshilik ınternette birneshe ret izdep, birneshe saıtty salystyryp baryp sheshim qabyldaıdy.
Úıdi ásemdeýge arnalǵan zattar da óte tanymal: jasandy jáne tiri shyrshalar, oıynshyqtar, gırlıandalarǵa suranys birneshe esege ósedi. Sonymen qatar jeltoqsanda kosmetıka men parfıýmerııany da jıi izdeıdi – ózine de, syılyqqa da satyp alatyndar kóbeıedi.
