Foto: Ashyq derekkóz
Serik Jarasbaevtyń málimdeýinshe, qazirgi ýaqytta mınıstrlik Jánibek Álimhanulynyń komandasymen turaqty baılanysta jumys istep jatyr.
Sonymen qatar vıse-mınıstr dopıngke qarsy uıymnyń synamadaǵy meldonııge qatysty málimeti saldarynan josparlanǵan jekpe-jek ótpeıtinin rastap, alaıda boksshynyń óz túsindirmesine senetinderin jetkizdi.
«Biz Jánibek Álimhanulynyń aıtqandaryna senemiz. Onyń dopıng qoldanbaǵanyna esh kúmánimiz joq. Zattyń aǵzaǵa qalaı túskenin anyqtaý úshin dopıngke qarsy uıymmen birlesip jumysty jalǵastyrý qajet», dedi Jarasbaev Májilis kýlýarynda.
Serik Jarasbaev jaǵdaıǵa asyǵys qorytyndy jasamaýǵa shaqyryp, tekserý tolyq aıaqtalǵan soń ǵana naqty sheshim shyǵatynyn atap ótti. Onyń sózinshe, qajet bolǵan jaǵdaıda halyqaralyq sarapshylardy tartý múmkindigi de bar.
«Mınıstrlik bul jaǵdaıdy nazardan tys qaldyrmaıdy. Biz sportshyǵa jan-jaqty kómek kórsetýge ázirmiz. Qazirgi ýaqytta túrli boljam aıtylyp jatyr, biraq resmı aqparattar shyqpaıynsha naqty baǵa berý durys emes. Ár sportshynyń óz quqyǵyn qorǵaý tetikteri bar, biz olardyń komandasyna qajet qoldaýdy kórsetýge daıynbyz», dedi ol.
Aıta keteıik, «The Ring magazine» basylymy Jánibek Álimhanulynyń dopıng testinen ótpeı qalǵanyn habarlaǵan edi.
Keıinnen Jánibek Álimhanuly dopıng-testileýden óte almaǵany týraly aqparatqa óz tańdanysyn bildirip, qaıta taldaý suratqany belgili boldy.
Buǵan deıin, WBO Jánibek Álimhanulynyń dopıng daýyna qatysty tekseristi bastaǵanyn jáne otandasymyzdyń komandasy daýǵa qatysty Jánibek Álimhanuly men Erıslandı Lara arasyndaǵy jekpe-jek ótpeıtinin resmı túrde málimdegenin jazǵan edik.
Esterińizge sala keteıik, 6 jeltoqsan kúni Jánibek Álimhanuly úsh belbeý úshin kýbalyq Erıslandı Laraǵa qarsy jekpe-jek ótkizýi tıis bolǵan edi.
