Foto: Aqorda
«Sońǵy jyldary básekelestiktegi artyqshylyqtarymyzdy tolyq ashýǵa, ekonomıkalyq ósimniń tyń múmkindikterin tabýǵa, ınvestısııa tartýǵa jáne kásipkerlik bastamalardy yntalandyrýǵa baǵyt aldyq. Úkimettiń aldynda sapaly ekonomıkalyq ósimdi qamtamasyz etý mindeti tur.
Joldaýda ınflıasııanyń sharyqtaýyna jol berýge bolmaıtynyn aıttym. О́ıtkeni ınflıasııa azamattardyń ál-aýqatyn arttyrýǵa baǵyttalǵan barlyq sheshim men áreketti joqqa shyǵarady. Bul oraıda óte qatań bıýdjet tártibin ornatpasa bolmaıdy. Qarjy tek ishki jalpy ónimniń ósýine, Qazaqstannyń álemdik arenada laıyqty ornyn alýyna yqpal etetin basym jobalar men baǵdarlamalarǵa ǵana jumsalýǵa tıis», dedi Prezıdent.
Memleket basshysynyń aıtýynsha, aýyl sharýashylyǵy ónimderimen, halyq kúndelikti tutynatyn taýarlarmen qamtamasyz etý máselesi tolyq sheshilmeı keledi. Import óte kóp.
«Ol kózge anyq kórinip tur. Birqatar taýar nomenklatýrasy boıynsha syrttan keletin ónimge tym táýeldimiz. Qazaqstanda buǵan jol berýge bolmaıdy. Onyń ústine bıyl memleket tarapynan aýyl sharýashylyǵyna 1 trıllıon teńge qoldaý jasaldy. Bul – rekordtyq kórsetkish. Al elimiz shyǵaratyn ónim kólemi 2024 jyldyń qorytyndysy boıynsha 8,5 trıllıon teńgege baǵalandy», dedi Qasym-Jomart Toqaev.
