Aýylǵa ortalyqtandyrylǵan sý júıesi arqyly aýyzsý qaıta berildi. Bul jaǵdaı «Bozoı toptyq sý qubyry» júıesinde bolǵan apattan keıin týyndaǵan edi. 6 qarashada uzyndyǵy 72 shaqyrymdy quraıtyn negizgi magıstraldi qubyrda aqaý oryn alyp, Aqsaı aýyldyq okrýgi men jaqyn ornalasqan Qonaev qalasynan sý tasymaldaý uıymdastyrylǵan. Turǵyndar shamamen bir aı boıy tek tasymaldanǵan sýdy paıdalanýǵa májbúr boldy.
Apattan keıin Almaty oblysynyń ákimi Marat Sultanǵazıev apparattyq keńes ótkizip, máseleni jedel sheshý úshin rezervtik qarjy bólgizdi. Nátıjesinde uzyndyǵy 2,6 shaqyrymǵa sozylǵan eskirgen qubyrdy aýystyrý jumystaryna 137 mıllıon teńge baǵyttaldy.
Jedel júrgizilgen kúrdeli jóndeý jumystarynyń arqasynda búgin Aqshı aýylyna qaıtadan taza aýyzsý berildi.
Aýyl halqy birneshe apta boıy bastan ótkergen qıyndyqtardyń artta qalǵanyna rıza.
«О́te qıyn boldy. Oblys ákiminiń tikeleı tapsyrmasymen rezervten qarjy bólinip, eki shaqyrymnan astam ábden eskirgen qubyr tez arada aýystyryldy. Sonyń arqasynda aýylymyzǵa qaıtadan aýyzsý berile bastady», deıdi aýyl turǵyny Dınora Safarova.
Al taǵy bir turǵyn Quralaı Amantaeva ortalyqtandyrylǵan sý júıesiniń qaıta qosylýyn úlken qýanyshpen qabyldaǵanyn aıtady.
«Búgin aýylymyzǵa tátti sý qaıta kelip jatyr. Qýanyshymyzda shek joq. Osy iske sebepker bolǵan azamattarǵa alǵysymyz sheksiz», dedi ol.
Sanepıdemıologııalyq qyzmet mamandary aýyldaǵy birneshe úıden sý synamasyn alyp, zerthanaǵa joldady. Qorytyndysy 2–3 kún ishinde belgili bolady.
Sý berý tolyq qalpyna kelgenimen, saqtyq maqsatynda arnaıy kóliktermen tasymaldanatyn aýyzsý qyzmeti ázirge jalǵasa beredi.
«Bozoı toptyq sý qubyry» mekemesiniń basshysy Nurıslam Saılaýbaevtyń aıtýynsha, qazirgi jaǵdaıda sý qysymy turaqty, nasos stansııalary shtattyq rejımde jumys istep tur. Alaıda bolashaqta osyndaı jaǵdaıdyń qaıtalanbaýy úshin magıstraldiń tolyq jańartylýy qajet.
«Bul qubyrdyń 72 shaqyrymyn tolyq aýystyrý kerek. Sonda mundaı problemalar bolmaıdy. Qazirgi sý qysymy jaqsy, Aqshıge sý birqalypty kelip tur», dedi mekeme basshysy.
О́tken jyly Aqshı aýylynda jańa aýyzsý júıesin tartý jobasy ázirlengen. Mamandardyń esebi boıynsha, onyń jalpy quny 7 mlrd 400 mln teńgeni quraıdy. Qajetti qarjy bólinse, aýyldaǵy aýyzsý máselesi tolyq sheshimin tabatyn bolady.
Almaty oblysy.
