Aqjaıyqta sport kesheni ashyldy

Úsh myńǵa jýyq turǵyny bar Aqjaıyq aýy­lynda salyn­ǵan bul jańa keshen zamanaýı standartqa saı boı kóter­gen. Munda aýyl jastaryna, barsha turǵyndarǵa sportpen aınalysýǵa, ýaqytyn tıimdi ótkizýge, den­saýlyǵyn nyǵaıtýǵa barlyq múmkindik bar.

«Memleket basshysy Qasym-Jomart Toqaev ár Joldaýynda sport salasyn damytý – strategııalyq mindet ekenin atap ótip keledi. El Prezıdentiniń «Jastardyń bos ýaqytyn tıimdi ótkizýi­ne jaǵdaı jasap, sport ınfraqurylymyn aýyldarda qoljetimdi etý – memlekettiń basym baǵyty. Sport seksııalaryn, úıirme­lerdi, aýyldyq sport nysandaryn kóbeıtý – deni saý ult qalyptastyrýdyń negizgi sharty», degen naqty tapsyrmasy bar. Búgingi ashylyp otyrǵan jańa sport kesheni memlekettik saıasattyń naqty júzege asqan jarqyn úlgisi», dedi nysannyń ashylý saltanatyna qatysqan Batys Qazaqstan oblysynyń ákimi Narıman Tóreǵalıev.

Jańa keshende sportpen shuǵyldanýshylarǵa qajetti ınfraqurylym tolyq qarasty­rylǵan. Atap aıt­qanda, boksqa ar­nal­ǵan arnaıy sportzal, kerek-jaraq saqtaıtyn ból­meler, nusqaýshylar ból­mesi, medısınalyq kómek kórsetetin kabınet, jat­tyqtyrýshylar men qyzmet­kerlerge arnalǵan jeke kabınetter, kıim iletin oryndar, ınjenerlik-teh­nıkalyq bólmelerdiń bári saqadaı saı tur. Barlyq sportzal oqý-jattyǵý sabaq­taryn ótkizýge qajetti zamanaýı jab­dyq­pen tolyq qam­tamasyz etilgen.

Sport kesheniniń esigine kerilgen lentany oblys ákimi Narıman Tóreǵalıev pen aýyl turǵyny, ardager sportshy, Terekti aýdanynyń balalar jáne jasóspirimder sport mektebiniń jattyq­ty­rýshysy, 2016 jylǵy ardagerler arasyndaǵy álem chempıonatynyń kúmis júl­degeri, 2025 jylǵy ardagerler arasyndaǵy el birinshiliginiń jeńimpazy Suńǵat Bekqalıev saltanatpen qıdy. О́ńir basshysynyń aıtýynsha, Aqjaıyq aýy­lyn­daǵy sport keshe­ni jalpy oblysta atqary­lyp jatqan júıeli jumystyń bir parasy ǵana. Bıyl oblys­ta osyndaı 14 keshen qolǵa alynǵan bolsa, sonyń tórteýi paıdalanýǵa berilgen, qal­ǵan 10-y jańa jylǵa de­ıin tapsyrylady. «Bunyń bári aýyl halqy úshin jasalyp jatqan ıgi sharalar. Aqjaıyqtyqtarǵa qutty bolsyn aıta keldik», dedi aımaq basshysy.

Batys Qazaqstan oblysy