Jıynda oblystyń bos óndiristik aımaqtary, ındýstrıaldy zonalary, logıstıkalyq habtary jáne iri jobalardy qabyldaýǵa daıyn ınfraqurylymdyq múmkindikteri tanystyryldy. Qatysýshylarǵa ónerkásip, aýyl sharýashylyǵy, qaıta óńdeý jáne týrızm baǵyttary boıynsha usynystar jasaldy.
Forýmdy ashqan Almaty oblysynyń ákimi Marat Sultanǵazıev óńirde ınvestorlarǵa qolaıly jańa ekonomıkalyq kezeń bastalǵanyn atap ótti. Onyń aıtýynsha, oblystyń ashyqtyǵy men ınvestısııa tartýǵa daıyn bolýy — naqty qoldaýmen bekitilgen strategııalyq baǵyt. Ákim óńirdiń qarqyndy damyp jatqanyn, zamanaýı ınfraqurylym, 7 jumys istep turǵan jáne 9 qurylý kezeńindegi ındýstrıaldy aımaq, logıstıkalyq parkter, GChP tetikteri jáne «Bir tereze» formatyndaǵy sıfrlyq servıster iske qosylǵanyn aıtty.
«Búginde ınvestorlardyń senimi naqty sandarmen kórinis tabýda. Biz jalpy quny 6,2 trln teńgeni quraıtyn 216 jobany baqylaýda ustap otyrmyz. Olardyń júzege asýy 80 myńnan astam turaqty jumys ornyn qurýǵa múmkindik beredi. 72 joba sheteldik kapıtaldyń qatysýymen iske asýda, quny — 3,9 trln teńge. Bul — halyqaralyq kompanııalardyń oblysty uzaq merzimdi damý alańy retinde tańdaýynyń aıqyn dáleli», dedi Marat Sultanǵazıev.
Forým qorytyndysynda jalpy quny 776 mlrd teńgeden asatyn 16 memorandýmǵa qol qoıyldy. Qujattar ónerkásip, agrosektor, logıstıka, energetıka jáne týrızm baǵyttaryn qamtıdy. Kelisimder aıasynda halyqaralyq qurylys kompanııasynyń jobasy, LED-ekrandar óndirisi, traktor shyǵaratyn zaýyt, iri ındýstrıaldy-logıstıkalyq keshen jáne zamanaýı kóterme-taratý ortalyǵy iske asyrylmaq.
Bul kelisimder óńir ekonomıkasyn jańǵyrtatyn naqty ınvestısııalyq sheshimder bolyp sanalady. Jańa óndirister ashylyp, qaıta óńdeý salasy kúsheıedi, aýyl sharýashylyǵy jańaryp, týrızm ınfraqurylymy damıdy, energetıkalyq jobalarǵa serpin beriledi.
Forýmǵa Qytaı Halyq Respýblıkasynyń Sındao qalasy ákiminiń orynbasary Gao Szıan, ortalyq memlekettik organdardyń ókilderi, halyqaralyq korporasııalar men iri ınvestorlar qatysty. Gao Szıan Almaty oblysymen áriptestikti keńeıtýge úlken múmkindik baryn aıtyp, Sındaonyń Qytaıdaǵy iri porttyq, óndiristik jáne logıstıkalyq ortalyqtardyń biri ekenin eske saldy. Onyń aıtýynsha, eki óńirdiń artyqshylyqtary birin-biri tolyqtyryp, avtomobıl jasaý, joǵary tehnologııalyq jabdyq, jasyl energetıka, bıomedısına, saýda jáne logıstıka salalarynda birlesken jobalarǵa jol ashady.
«Almaty oblysymen yntymaqtastyq birneshe perspektıvaly baǵytty qamtıdy. Biz birge jańa óndirister ashyp, zamanaýı tehnologııalar engizip, kólik dálizderiniń tıimdiligin arttyra alamyz», dedi ol.
Sońǵy jyldary Almaty oblysy ınvestısııalyq ósimdi turaqty kórsetip keledi: 2022 jyly — 614 mlrd teńge, 2024 jyly — 1 trln teńgeden joǵary, al 2025 jyldyń 10 aıynda 834 mlrd teńge ıgerilip, fızıkalyq kólem ındeksi 116% boldy. Jyl sońyna deıin ınvestısııa kólemin 1,3 trln teńgege jetkizý josparlanyp otyr.
О́ńirde sońǵy jyldary birneshe iri nysan iske qosyldy. Atap aıtsaq, «Focus Logistics» logıstıkalyq parki, «Altyn Taǵa» beton zaýyty, «LC Waikiki» kóterme ortalyǵy, «KegenMıasProm» et kombınaty, «Shın-Laın» balmuzdaq fabrıkasy jáne keńeıtilgen «Qapshaǵaı Bıdaı О́nimderi» agrokompleksi. Jyl sońyna deıin «MP Solution», «Kusto Logistics», «Eýrazııalyq logıstıkalyq park», «Imagine Apple Logistics» sııaqty A klasyndaǵy jańa logıstıkalyq keshender paıdalanýǵa beriledi. Sonyń arqasynda óńirdiń zamanaýı logıstıkalyq qýaty 16 esege ósip, 7 myńnan 111 myń sharshy metrge deıin ulǵaıdy.
Tamaq ónerkásibinde eksportqa baǵyttalǵan óndirister de kúsheıýde: «Galanz Bottlers», «QAZAQ GLOBAL FOOD» jáne «Prıma Qus» sonyń dáleli. Barlyq iske asyp jatqan jobalar men forým aıasynda jasalǵan kelisimder Almaty oblysynyń ınvestısııalyq kartasyn jańa deńgeıge shyǵaryp, óńirdi el ekonomıkasynyń negizgi draıverleriniń birine aınaldyryp otyr.
Almaty oblysy.
