Ustazǵa arnalǵan klassıkalyq án keshi

Qazanǵap atyndaǵy Qyzylorda mýzy­kalyq kolledjinde eńbek etken Perýza Amangel­diqyzy – talaı jastyń talabyn ushtap, úlken sah­nalarǵa jol ashqan ustaz. Dástúrli áýen tý tikken óńir­de búkil adamzat órke­nıetiniń asyl murasy sanalatyn klassıkalyq ónerdiń órken jaıýyna úles qosqan Perýzanyń shákirtteri halyq­aralyq, respýblıkalyq konkýrstarda laýreat atandy. Ulaǵatty ustazdan tálim alǵan qyz-jigitter búginde elimizben qosa shetelderde de bilim alyp, álem sahnalarynda óner kórsetip júr.

Perýza Arǵynbaevanyń shyǵarmashylyǵy men ómiri týraly kórsetilimmen bas­talǵan klassıkalyq kesh­te Qazaqstannyń eńbek sińirgen qaıratkeri Músi­lim Ámze dırıjerlik ete­tin sımfonııalyq orkestr súıemeldeýimen respýblı­ka­lyq, halyqaralyq baıqaýlar­dyń laýreattary Gaýhar Ahe­tova, Aıbek Haırolla, Ǵazıza Júsipbekova, Erbol Mu­ha­nov, Saltanat Muratqyzy, Al­tynbek Arystanbek, Farıda Buldanovalar óner kórsetti.

Ustaz esimin jańǵyrtqan keshtiń arnaıy qonaǵy álemdik opera sahnasyn baǵyndyrǵan talantty ánshi, Qazaqstannyń eńbek sińirgen qaıratkeri Áıgerim Altynbek boldy. Bıyl Italııada ótken HI ha­lyqaralyq CLIP 2025 opera baıqaýynda top jaryp, jaqynda ǵana álemge áıgili La Skala teatrynda debıýt jasaǵan Áıgerim Qazanǵap atyndaǵy mýzykalyq kolledj­de Perýza Arǵynbaevanyń synybynda oqyǵan. Klassıkalyq baǵyty da osy kezden bastalyp, ustazy shákirtin opera janryndaǵy túrli baıqaýlarǵa qatystyryp, ónerin shyńdapty.

Áıgerim Altynbek ustaz rýhyna taǵzym retinde Dj.Pých­chınıdiń «Týrandot» operasynan Lıý arııasy men basqa da álem jurtyna belgili týyndylardy oryndady. Keshti barlyq shákirtteri qosy­la shyrqaǵan «Ustazym meniń» áni túıindedi. Jalpy, osy kúni sahnadaǵy árbir áýen­nen saǵynyshtyń úni esip turdy.

Kesh barysynda oblystyq mádenıet, arhıvter jáne qujat­tama basqarmasy bas­shysynyń orynbasary Qýa­nysh Januzaqov, Perýza Arǵynbaevanyń áriptesi, Qazaqstannyń eńbek sińirgen qaıratkeri Keýlimjaı Bo­tabaev shákirtteri esimin jań­ǵyrtqan óner ıesi jaıynda jú­rek terbeter estelik aıtty.

QYZYLORDA