Parktiń ashylý rásimine Almaty oblysynyń ákimi Marat Sultanǵazıev, Saýda jáne ıntegrasııa birinshi vıse-mınıstri Aıjan Bıjanova, sondaı-aq logıstıka jáne development salasynyń jetekshi kompanııalary qatysty.
Jobanyń jalpy ınvestısııa kólemi – 22 mlrd teńge. Birinshi kezeńde 50,3 myń sharshy metr bolatyn «A» sanatyndaǵy zamanaýı eki qoıma korpýsy iske qosyldy. Tóbesiniń bıiktigi 2 metrlik, sharshy metrine 8 tonna júk kóteretin eden jáne órt qaýipsizdiginiń halyqaralyq standartyna saı keletin joǵary klasty qoıma bar. Park tolyq qýatyna aldaǵy jyly shyǵady. Sol kezde 250 adam turaqty jumyspen qamtylatyn bolady.
«Jańa logıstıkalyq park – eldiń tranzıttik múmkindigin arttyrýǵa, halyqaralyq saýda aǵymdaryn tıimdi basqarýǵa jáne óńirlik yqpaldastyqty tereńdetýge baǵyttalǵan mańyzdy joba. «A» sanatyndaǵy jańa nysandardyń iske qosylýy – oblys ekonomıkasynyń turaqty damýy men ınvestorlardyń seniminiń naqty kórinisi, sondaı-aq memleket pen bıznestiń tıimdi seriktestiginiń nátıjesi», degen óńir basshysy Marat Sultanǵazıev jobanyń mańyzdy tustaryn atap ótti.
О́z kezeginde Saýda jáne ıntegrasııa birinshi vıse-mınıstri Aıjan Bıjanova:
«Bul park – Qazaqstannyń halyqaralyq kólik dálizderine shyǵýdy keńeıte túsedi. Mundaı aýqymdy ınfraqurylym otandyq bızneske jańa múmkindikter ashyp, elimizdiń Eýrazııadaǵy saýda haby retindegi ornyn bekite túsedi», dedi.
Bastamanyń tehnıkalyq parametrlerin kópshilik nazaryna usynǵan «Eýrazııalyq logıstıkalyq parktiń» atqarýshy dırektory Roman Jýjlev aýqymdy joba kez kelgen stellajdy nemese kópdeńgeıli saqtaý júıesin ornatýǵa múmkindik beretinin tilge tıek etti.
Saltanatty shara barysynda Talǵar aýdanynyń ákimi Tańat Aıdarbekov jobanyń aýdan damýyna oń áser etetinin atap aıtty.
Al Ozon Qazaqstan kompanııasynyń basshysy Alekseı Sapon onlaın-saýda tıimdiliginiń zamanaýı qoımalarǵa tikeleı baılanysty ekenin aıtsa, DNS kompanııasynyń logıstıka jónindegi federaldyq basshysy Vladımır Lıýbımov jergilikti habtar jelisi tapsyrystardy jetkizý ýaqytyn aıtarlyqtaı qysqartatynyn málimdedi.
Investorlar park aýmaǵyn Qulja baǵyty arqyly keńeıtýdi kózdep otyr. Josparda 300 myń sharshy metrge deıin qosymsha qoıma alańyn salý jáne kórshi elderdiń naryǵyna shyǵý qarastyrylǵan. Sudakov Group bas dırektory Alekseı Sýdakov aıtýynsha, fýnksıonaldy qoıma nysandaryna suranys turaqty túrde artyp otyr.
Saltanatty shara barysynda Noytech jáne «Eýrazııalyq logıstıkalyq park» arasynda strategııalyq áriptestik týraly kelisimge qol qoıyldy. Noytech-tiń Qazaqstandaǵy dırektory Valerııa Kosheleva jańa nysan joǵary tehnologııalyq servısterdi damytý men qyzmet túrlerin keńeıtýge jol ashatynyn jetkizdi.
Almaty oblysy,
Talǵar aýdany
