Bul jóninde О́ńirlik kommýnıkasııalar qyzmeti alańynda ótken baspasóz jıynynda «Shyǵys» óńirlik áskerler qolbasshylyǵy basqarmasynyń zań basqarmasy basshysy, podpolkovnık Beıbit Tansarov aıtyp berdi.
– Bıylǵy 18 naýryzda qabyldanǵan «Áskerı qyzmet jáne áskerı qyzmetshilerdiń mártebesi týraly» zańǵa engizilgen ózgeristerge sáıkes rezervtik áskerı qyzmetke qabyldaý jumystary júrgizilip jatyr. Rezervtegi áskerı qyzmetke 18 ben 57 jas aralyǵyndaǵy, áskerı kýáligi bar, moraldyq jáne kásibı talaptarǵa saı, sondaı-aq densaýlyq jaǵdaıy jaramdy dep tanylǵan jumys isteıtin jáne jumyssyz azamattar qabyldanady, – dedi basqarmasy basshysy.
Onyń aıtýynsha, jańa formatty engizý – Qarýly Kúshterdi jasaqtaý júıesin jetildirýge jáne qajet bolǵan jaǵdaıda mobılızasııalyq resýrsty jedel qalyptastyrýǵa múmkindik beredi. Al «Shyǵys» óńirlik áskerı qolbasshylyǵy basqarmasynyń kadr bastyǵy, podpolkovnık Baqyt Jumabekov bul týraly keńinen tarqatyp aıtty.
– Úsh jyldyq kelisimshartqa otyrǵan azamattar jyl saıyn 30 kúndik dalalyq oqý-jattyǵýlarǵa, sondaı-aq aı saıyn 3 kúndik jaýyngerlik daıyndyq sabaqtaryna qatysady. Osylaısha, árbir rezervıst jylyna 60 kúndik daıyndyqtan ótedi. Jumys isteıtin rezervısterge – ortasha aılyq jalaqysy, al jumyssyzdarǵa eń tómengi jalaqy tólenedi. Daıyndyq kezeńinde medısınalyq qamtamasyz etý bıýdjet esebinen júrgiziledi, – dedi kadr bastyǵy.
Rezervtik áskerı qyzmetke qabyldaý jergilikti áskerı basqarý organdary arqyly júzege asyrylady.
Abaı oblysy
