Foto: ashyq derekkóz
Sottyń baspasóz qyzmeti naqtylaǵandaı, bastamany baǵalaý barysynda usynylǵan ózgeristerdiń Konstıtýsııamen úılesimdiligi, túzetýdiń konstıtýsııalyq qurylym negizderine yqpaly jáne Qyrǵyzstannyń halyqaralyq mindettemelerine sáıkestigi eskerilgen.
Konstıtýsııalyq sot negizgi quqyqtardyń júıeli sıpatyn eske salyp, olardy álsiretýge jol berilmeıtinin atap ótti.
«Konstıtýsııa adamnyń quqyqtary men bostandyqtaryn eń joǵary qundylyq retinde bekitedi, al olardy qamtamasyz etý kepildikteriniń júıesi konstıtýsııalyq qurylymnyń negizin quraıdy jáne negizgi zańǵa engiziletin ózgeristerdiń shegin aıqyndaıdy. Quqyqtar men bostandyqtar kepildikteriniń deńgeıin tómendetýge jol bermeýge erekshe nazar aýdarý qajet», delingen resmı málimdemede.
Sotta sonymen qatar ólim jazasyna tyıym salý jáne ómir súrý quqyǵynyń basymdyǵy tek quqyqtyq emes, sondaı-aq qundy mańyzǵa da ıe ekeni aıtyldy. Konstıtýsııa eldiń quqyqtyq júıesiniń quramdas bóligi bolyp sanalatyn halyqaralyq sharttar boıynsha mindettemelerdi saqtaýdy talap etedi.
«Vena konvensııasyna sáıkes, memleket halyqaralyq shartty oryndamaýdy óziniń ishki quqyǵynyń normalarymen aqtaýǵa quqyly emes», dep eske saldy Konstıtýsııalyq sot.
Ulttyq jáne halyqaralyq-quqyqtyq ýájderdiń jıyntyǵy negizinde Qyrǵyzstan Konstıtýsııalyq soty ólim jazasyn konstıtýsııalyq túzetý arqyly qaıtarý negizgi zańǵa qaıshy jáne quqyqtyq turǵydan múmkin emes ekenin aıtty.
Osyǵan baılanysty zań jobasy referendýmǵa shyǵarylmaıdy, al bastamany iske asyrýǵa baılanysty barlyq rásimder Konstıtýsııalyq sot sheshimi kúshine engen sátten toqtatylady.
Eske sala keteıik, buǵan deıin Qyrǵyzstan prezıdenti Sadyr Japarov elde ólim jazasyn engizýdi tapsyrǵan bolatyn. Mundaı sheshimge Ystyqkólde 17 jastaǵy qyzdyń qatygezdikpen óltirilýi sebep bolǵan. Keıin Sadyr Japarov Qyrǵyzstanda ólim jazasyn qaıtarý máselesi referendýmǵa shyǵarylýy múmkin ekenin málimdedi.
