Aqparatta jabaıy janýarlar Qarasýyq aýdanyndaǵy kólderde qatqan jaltyr muzdan óte almaı, top-tobymen qyrylyp qalǵany aıtylady. Jergilikti tabıǵat qorǵaý vedomstvosy muzdy kólderdiń birinde janýarlardy qutqarý jónindegi «kúrdeli jáne aýqymdy operasııany» ınspektorlar ańshylarmen birlesip júrgizdi dep málimdegen. Áıtse de olar júzdegen janýar qyrylyp qaldy degen aqparat durys emes deıdi. Al qarasýlyq turǵyndar ınspektorlar elikterdi qutqarǵanymen, jaǵaǵa laqtyryp tastap jatqandaryna qynjylys tanytyp otyr. Shyn máninde janýarlardyń boıyn jylytyp, sosyn bosatý kerek ekenin alǵa tartady.
Novosibir oblysynyń Qarasýyq aýdany Pavlodar oblysynyń Tereńkól, Ýspen aýdandarymen shekaralas. Qos memlekettiń bul aýmaqtaǵy shekarasynda Qarasýyq, Shaǵan kólderi ornalasqan. Reseıdiń ishki jaǵynan aýa bastaǵan túz taǵylary atalǵan sý aıdyndaryn basyp ótýi yqtımal.
Pavlodar oblystyq orman sharýashylyǵy jáne janýarlar dúnıesi aýmaqtyq ınspeksııasynyń ókilderi shekaralyq aımaqtarda elikterdiń qyrylýy týraly aqparat túspegenin habarlady.
«Qazirgi ýaqytta sibir elikterinde kúıekke túsý mezgili bastaldy. Jabaıy janýarlar shaǵylysýǵa qolaıly jer izdep, mıgrasııa jasaıdy. Elikterdiń shoǵyrlanyp, top-tobymen kóship-qonýy týraly málimetter bar. Tek Pavlodar oblysynda ǵana emes, Qaraǵandy óńirinde elikterdiń shoǵyrlanýy tirkelgenin áriptesterimiz aıtyp otyr. Bul – ýaqytsha qubylys. Biraq janýarlardyń ólýi týraly aqparat joq. Qazir biz jergilikti orman sharýashylyqtarynan elikterdiń qozǵalysy men turyp qalýyna qatysty málimetter jınap jatyrmyz. Onyń nátıjesi eki-úsh kúnde belgili bolady», deıdi óńirlik orman sharýashylyǵy jáne janýarlar dúnıesi aýmaqtyq ınspeksııasynyń basshysy Isataı Abdrazahov.
Qar qalyń túsken jyldary elikter eldi mekenderdi, sonyń ishinde Pavlodar qalasyn jıi jaǵalap, azyq izdeıdi. Ertis ózeniniń jaıylmasyndaǵy tabıǵı qaýmalda ańshylyq jasaýǵa tyıym salynǵan. Mamandardyń aıtýynsha, elikter kóbine ózen boıyndaǵy toǵaılar arasyn mekendeıdi. Ashyq alańqaılarda, oıpań jerlerde qar qalyń tússe, tebindeýine kedergi keltirýi múmkin. 2023, 2024 jyldary janýarlardyń adamdardan qoryqpaı, qala kóshelerin kezip ketetini jıi tirkelgen.
Eliktiń sany da jyl ótken saıyn ósip keledi. 2023 jyldyń kúzinde olardyń sany 4200-deı bolsa, resmı málimetterge sáıkes, qazir Pavlodar oblysynyń aýmaǵynda shamamen 4800-deı elik bar. Ańshylyqqa tyıym salynǵany sebepti, elikter, ózge de túz taǵylary erkinsip, aýyl-qalalarǵa jıi kelgishteıdi.
Pavlodar oblysy
