Pavlodar qalasyndaǵy daryndy balalarǵa arnalǵan №8 mektep-lıseıiniń 11-synyp oqýshysy Ásel Abdýrahımova elimizdegi jas polıglottar arasynda aıryqsha tanylǵan talantty qyz. Ol búginde álemniń 10 tilin biledi ári onyń basym bóligin óz betinshe meńgergen.
Shetel tilderine degen qyzyǵýshylyq bala kezinen bastalypty. Jeti jasynda-aq ol álem elderiniń barlyq astanasyn biletin ári túrli mádenıet ókilderimen sóılesýdi armandaıtyn.
– Toǵyz jasymda fransýz tilin ózdigimnen úırene bastadym. Al on birge tolǵanda Pavlodar qalasyndaǵy alǵashqy kýrsqa bardym. Aǵylshyn tilin 2018 jyldan beri oqyp kelemin. Bul til qazirgi ýaqytta kúndelikti ómirimniń ajyramas bóligine aınalǵan. Qytaı tilin kýrstarda oqyp meńgerdim. Qazir ony jalǵastyryp, halyqaralyq HSK 3 deńgeıi (B1) emtıhanyn tapsyrýǵa daıyndalyp júrmin, – deıdi Ásel.
Memlekettik til men ana tili – tájik tilinen bólek ózge tilderdi, atap aıtqanda ózbek, orys, ıspan, ıtalııan, japon (N4) tilderin álem mádenıetterine degen qyzyǵýshylyǵy men túrli halyqty túsinýge degen umtylysynyń arqasynda tolyqtaı óz betinshe meńgergen. Ol bul tilderdiń barlyǵynda erkin sóıleıtin dárejege jetip otyr.
«Men árdaıym saıahattap, túrli eldiń adamdarymen erkin sóılesýdi armandaıtynmyn. Kelesi maqsatym – arab tilin úırenip, BUU-nyń alty resmı tilin tolyq meńgerý. Bul alǵa umtyldyratyn jáne jańa kókjıekterdi ashýǵa shabyttandyratyn arman», deıdi ol.
Mektep ákimshiligi Ásel oqýshylar arasynda eńbekqorlyǵymen, tárbıesimen ózgelerge úlgi ekenin atap ótti. Onyń jetistikteri qurby-qurdastaryn yntalandyryp, bilimge degen talpynys pen tabandylyq orasan nátıjelerge jetkizetinin dáleldep otyr.
PAVLODAR
