О́ńirde órt sóndirý beketteriniń sany artyp, olardyń tehnıkalyq múmkindigi kúsheıip keledi. Jańa beketterdiń iske qosylýy – ortalyq-tan shalǵaıdaǵy eldi mekenderdiń qaýipsizdik deńgeıin kóterýge múmkindik berip otyr. Zamanaýı tehnıkamen jabdyqtalǵan beketter órttiń aldyn alý men saldaryn azaıtýda mańyzdy ról atqarady.
Dmıtrıevka aýylyndaǵy «ShyǵysOrmanIndýstrııa» JShS bazasynda ashylǵan jańa órt sóndirý beketi táýlik boıy jumys isteıdi. Zamanaýı quraldarmen jabdyqtalǵan. Atap aıtqanda, demalys bólmesi, as úıi, sanıtarlyq torap, tazalyq bólmeleri bar. Beket turmystyq, dala, orman órti kezinde jedel áreket etýge baǵyttalǵan. Nysannyń ashylýyna oblys ákiminiń orynbasary Serik Tólenbergenov pen tótenshe jaǵdaılar departamentiniń basshysy Manarbek Shapaǵatov qatysty.
«Oblysta 72 órt sóndirý beketi bar, sonyń toǵyzy bıyl ashyldy. Bul nysandar 94 myńǵa jýyq turǵyndy qamtıtyn 165 eldi mekenniń qaýipsizdigin qamtamasyz etedi. Bıyl Zenkovka, Petropavlovka, Mıhaılıchenkovo aýyldarynda da jańa beketter iske qosyldy», dedi oblys ákiminiń orynbasary.
Sonymen qatar Aqsýat aýdanynda da órt qaýipsizdigi kúsheıtilip, bólimshe zamanaýı tehnıkamen tolyqty. Aýdan aýmaǵynda Qyzylkesik, Qumkól, Oıshilik, Kindikti, Kókjyra, Sátbaev, Yrǵyzbaı aýyldyq okrýgterinde ornalasqan 7 órt sóndirý beketi turaqty jumys istep tur.
«Onda 21 qyzmetker táýlik boıy qoǵamdyq qaýipsizdikti qamtamasyz etedi. Bıyl aýdanda 30-dan astam órt der kezinde sóndirildi. Búginde «Aýyl qutqarýshylary» baǵdarlamasy aıasynda Qyzylkesik, Kindikti aýyldarynda jańa órt beketteriniń qurylysy júrip jatyr», deıdi M.Shapaǵatov.
Ákimdiktiń dereginshe, Borodýlıha aýdanynda orman alqaby shamamen 87 773 gektar. Buǵan qosa «Semeı ormany» tabıǵı rezervatyna qaraıtyn ormandy alqaptar bar. Alaıda orman órtiniń tútini seıile qoıǵan joq. Byltyr sáýir aıynda ǵana Borodýlıha aýdanyndaǵy «Semeı ormany» tabıǵı rezervatyna qarasty aýmaqta orman órti shyǵyp, álekke salǵany esimizde.
Osy rette, jańa órt sóndirý beketiniń ashylǵanyna qýanǵan turǵyndar bul salanyń áli de jetile túsýin tileıdi. Olardyń aıtýynsha, Borodýlıha aýdanynda órt qaýipsizdigin kúsheıtý – óńirdiń tabıǵı jaǵdaıynan týyndap otyrǵan naqty qajettilik. Munda orman alqaptary men aýyldar bir-birine taıaý ornalasqan, jaz aılarynda qýraǵan shóp pen ańyzaq jel órttiń lezde órshýine ákelip soǵady. Osyndaı tótenshe jaǵdaılarda jańa beketterdiń ashylýy, tehnıkanyń tolyǵyp, jedel toptardyń daıyn bolýy – ormandy da, eldi mekenderdi de qorǵaýdyń basty kepili. О́rt qaýipsizdigin kúsheıtý qorshaǵan ortany qorǵap qana qoımaı, turǵyndardyń da tynyshtyǵyn qamtamasyz etedi.
Abaı oblysy
