Sýret: pavlodarnews.kz
Sharbaqtynyń túleı túskenin syrt kózdiń ańǵarmaýy múmkin emes. Áleýmettik ınfraqurylymdy nyǵaıtý, halyqtyń turmysyn arttyrý, aýyl sharýashylyǵyna jańadan ınvestısııalar tartý jáne t.b. salalarda oblys bıyl úzdikter qatarynan kórinip, Memleket basshysy belgilegen mindetterdiń ornymen oryndalǵanyna kýá boldyq.
Ádette keıbir jergilikti ákimder esep bere qalsa, óńirlerdiń damýynda qaǵazda bar, shynaıy ómirde joq kórsetkishterdi uzyn-sonar tizetini málim. Al munda at basyn bursańyz, naqty isterdiń júzege asyrylǵanyna kóz jetkizesiz.
Resmı málimetterge súıensek, keıingi eki jylda áleýmettik sala men ınfraqurylymdy jańǵyrtý, jańadan qurylys salý boıynsha 86 joba júzege asyp, 8 mlrd teńgeden astam qarjy jumsalǵan. Bir ǵajaby, jańǵyrtý jumystary negizinen aýdan ortalyǵynda emes, aýyldarda iske asqan. Jol kartasy boıynsha aýdan joldarynyń 80 shaqyrymnan astamy jóndelip, eldi mekenderdiń kóptegen kósheleri bútindeldi. Keıbir aýyldarda jaıaý júrginshiler joldary, baǵdarshamdar paıda boldy. Jylybulaq, Shaldaı, Esilbaı, Krasılovka, Alekseevka, Orlovka, Sahnovka, Malınovka jáne t.b. eldi mekenderdiń kósheleri kóriktene tústi. Tórt aýylda jańadan balalar alańdary salyndy.
Jaqyn ýaqytta Sharbaqty, Hmelnıskoe, Galkın, Maraldy, Sosnovka, Jylybulaq aýyldaryn qosa alǵanda, 18 eldi mekenniń halqy ortalyqtandyrylǵan aýyzsý júıesine qosylady. Nátıjesinde, aýdan halqynyń 95%-y aýyzsýmen qamtamasyz etiledi.
Munda uıaly baılanys sapasy da jaqsara túsken. «250+» baǵdarlamasy aıasynda Arbıgen, Shegiren jáne Jańaýyl aýyldarynda qamtý deńgeıi kúsheıtildi, Jylybulaq, Malınovka jáne Sadyqashy aýyldarynda jańa bazalyq stansalar ornatylsa, Syntas aýylynda baılanys munarasynyń qurylysy bastaldy.
Oblys ákimi Asaıyn Baıhanov Sharbaqty aýdany barlyq makro kórsetkishter boıynsha oń dınamıkany kórsetip otyrǵanyn aıtady. Áleýmettik ınfraqurylymdy nyǵaıtý jumystary da ońymen jalǵasýda. Alekseevka aýylyndaǵy shaǵyn ortalyqqa, Krasılovkadaǵy mektepke jáne Sharbaqtydaǵy «Baldáýren» balabaqshasyna kúrdeli jóndeý júrgizildi, oqý kabınetteri jańa úlgide jabdyqtaldy. Densaýlyq saqtaý salasynda barlyq aýyldyq okrýgter sanıtarlyq kóliktermen jáne medısınalyq jabdyqtarmen qamtamasyz etildi. Turǵyndardyń ótinishi boıynsha Sharbaqty aýylyndaǵy dene shynyqtyrý-saýyqtyrý keshenine kúrdeli jóndeý júrgizýge jáne aýyldyń ońtústik jaǵynda jańa sport keshenin salýǵa 300 mln teńge bólindi. Mańyzdy áleýmettik qadamdardyń biri – úı kezeginde turǵan aýdan turǵyndarynyń sany bıyl eki ese qysqarǵan.
– О́ńir boıynsha halyqtyń sany 18 myńnyń ústinde. Keıingi jyldary úı kezeginde turǵandardyń máselesin sheshýge kóp kóńil bolyp otyrmyz. Tek bıyl 110 adam jańa baspanaǵa ıe boldy. Olarǵa arnap úsh kóppáterli úıler turǵyzylyp, janynan sport alańdary, balalarǵa arnalǵan oıyn alańdary salyndy. Bul ıgilikter adamı kapıtaldy damytýǵa, halyqtyń jaıly ómir súrýine arnalǵan, – deıdi Sharbaqty aýdanynyń ákimi Serjan Imanqulov.
Aýyl sharýashylyǵy – aýdan ekonomıkasynyń negizgi salasy. Mundaǵy ónimniń jalpy kólemi 28 mlrd teńgeden asyp túsken. Bir ǵana egin sharýashylyǵynda 7,8% ósim baıqalyp, 16 mlrd teńgege jetken. Bul jetistigi úshin aýdannyń 12 sharýashylyǵy memlekettik jáne vedomstvolyq marapattarǵa ıe boldy.
«Kelesi jyly jumystar kúsheıtiledi, ásirese óńdeý ónerkásibi men sýmen jabdyqtaý baǵytynda jandanbaq. Aldaǵy jyly aýdanda birneshe aýqymdy ınvestısııalyq jobany iske qosý josparlanǵan. Solardyń biri – «BelAgro Group» JShS-nyń Sharbaqty aýylynda 500 gektar sýarmaly alqapty iske qosý jobasy, onyń ınvestısııa kólemi – 2 mlrd teńge. Nazarovka aýylynda birden 3 ınvestısııalyq jobany júzege asyrý josparlanýda: 600 ga sýarmaly alqapty iske qosý, 6000 tonnaǵa arnalǵan kókónis qoımasy jáne 600 bas malǵa arnalǵan taýarly-sút fermasy.
«Jańa jumys oryndarynyń ashylýy jáne shaǵyn bıznestiń damýy nátıjesinde jumyssyzdyq 4,1% deńgeıinde saqtalyp otyr, bul oblystaǵy eń jaqsy kórsetkishterdiń biri», dep qosty aýdan basshysy.
Aýdannyń týrızmdi damytý úshin tabıǵı áleýeti joǵary. О́tken jazda «Maraldy» kýrorttyq aımaǵyna 40 myńnan astam adam kelgen. Kýrorttyq aýmaqty júıeli túrde jańǵyrtýǵa daıyndyq jumystary bastaldy. Jyl saıyn myńdaǵan adam zııarat etýge keletin Ǵabdul Ýahıt haziret kesenesi ornalasqan «Ertis ormany» aımaǵynda ekologııalyq týrızm, sondaı-aq etnotýrızm belsendi damyp keledi. Endigisin týrızmge ınvestısııalar tartý jumysyn jandandyryp, «Qaraǵaı alańy» qonaqúı jobasyn damytý kózdelgen.
Pavlodar oblysy,
Sharbaqty aýdany
