Batys Qazaqstanda munaı urlaǵandarǵa úkim shyqty

ORAL. 22 aqpan. Batys Qazaqstan aımaǵynda munaı óndirý isimen aınalysatyn «Jaıyq munaı» JShS ıeligindegi qubyrdan iri kólemde munaı urlanǵany belgili bolyp otyr. Bul týraly egemen.kz tilshisi habarlady. Bul otandyq fırmaǵa qarasty qubyrdan jymqyrylǵan strategııalyq shıkizat menshik ıelerine 42 mıllıon 500 myń teńge zalal keltirgen. Osyǵan oraı Oral qalalyq soty jymysqy áreketti iske asyrǵan Iý.Kozlovqa qatysty úkimdi jarııa etti. Tıisti quqyq qorǵaý organdarynan túsken derekterge qaraǵanda ol taǵy bir munaı urlaýdy kásip etken K.Boranbaevpen birge ózara qylmystyq top quryp, seriktestikke qarasty munaı ónimderin eshqandaı qujatsyz elmizdiń ózge óńirlerine jóneltip otyrǵan. Olardyń bul qylmystary áshkerlenip, tıisti qylmystyq jazaǵa tartyldy. Atap aıtqanda, Iý.Kozlov Qylmystyq kodekstiń tıisti baby men tarmaǵyna sáıkes múlki tárkilenip, 6 jylǵa bas bostandyǵynan aıyryldy. Onyń sybaılasy K.Boranbaevqa da jaza belgilendi. Ol úsh jyl jeti aı merzimge sottaldy. Endigi jerde ekeýi de jazalaryn jalpy tártiptegi túzeý kolonııasynda óteıdi. Urlanǵan munaı ónimderi úsh avtokólikpen tasymaldanǵan. Is barysynda bul kólik quraldary da tárkilendi. Sot talqysy kezinde K.Boranbaevtan 8 mln. 500 myń teńge aqsha tabyldy. Memlekettik aıyptaýshynyń ótinishi boıynsha bul qomaqty soma da memleket paıdasyna engizildi. Sot úkimi zańdy kúshine engen joq. Temir Qusaıyn. Derek, sýret: egemen.kz.