«Aqyldy qalalar» qurý ádistemesine sáıkes, 2024 jylǵy 13 qyrkúıekte oblys ákiminiń №141-ókimimen jol kartasy bekitildi. Jol kartasy aıasynda 22 negizgi jáne 5 qosymsha joba qarastyrylǵan. Búgingi tańda 22 negizgi jobanyń 12-si oryndalyp, 10-y oryndalýda, qosymsha 5 jobanyń ekeýi oryndalyp, 3 joba oryndalýda.
«Aqyldy qalalardy» damytý strategııasy men ony iske asyrýdyń jol kartasyn bekitý maqsatynda oblys ákiminiń 2025 jyldyń 19 qarashasyndaǵy №143-ókimimen «Aqyldy qalany» damytý máseleleri boıynsha arnaıy jumys toby quryldy. Atalǵan jumys tobynyń usynystary men saraptamalyq qorytyndylary negizinde «2026-2030 jyldarǵa arnalǵan oblysta «Aqyldy qalalardy» damytý strategııasy jáne ony iske asyrý jónindegi jol kartasy» bekitildi. Jol kartasynda Taraz qalasy boıynsha 13 negizgi jáne 2 qosymsha, al aýdandar boıynsha 8 bastama qarastyrylǵan.
Búgingi tańda sıfrlyq transformasııa men tehnologııalyq sheshimderdiń qarqyndy damýyna baılanysty IT ekojúıesin qalyptastyrý óńirdiń jahandyq básekege qabilettiligin arttyrýdyń negizgi faktory bolyp otyr. Atalǵan baǵyttardy iske asyrý aıasynda Sherhan Murtaza atyndaǵy Halyqaralyq Taraz ýnıversıteti, oblys ákimdigi jáne «Astana Hub» Halyqaralyq tehnoparki arasynda óńirlik IT-habty damytý jóninde úshjaqty memorandýmǵa qol qoıyldy. Osy memorandým negizinde 2023 jyldyń 4 aqpanynda ýnıversıtet aýmaǵynda «ZhambylHub» óńirlik IT-haby quryldy. Búginde bul hab óńirlik startaptarǵa, jas kásipkerlerge, sondaı-aq IT salasyna qyzyǵýshylyq tanytqan jastarǵa qoldaý kórsetetin, ınnovasııalyq ıdeıalardy ilgeriletýge jaǵdaı jasaıtyn mańyzdy platformaǵa aınaldy. Hab qurylǵaly beri 150-den asa is-shara ótkizilip, 4 000-nan asa qatysýshy qamtyldy. Onyń ishinde 2024 jyly 68 is-shara, bıylǵy jyldyń basynan búgingi kúnge deıin 103 is-shara ótkizildi. 2025 jyldyń 19 naýryzynda «ZhambylHub» Jambyl oblysy boıynsha resmı túrde «Innovasııalyq tehnologııalar parki» AKQ-nyń fılıaly retinde tirkeýden ótti.
Qazirgi ýaqytta IT-habtyń qyzmetin odan ári damytý maqsatynda Taraz qalasyndaǵy «Innovasııalyq tehnologııalar parki» avtonomdy klasterlik qory fılıalyn 2025 jyly damytýǵa arnalǵan jol kartasy bekitildi. Jol kartasy aıasynda is-sharalarǵa qoldaý kórsetýge qyzyǵýshylyq tanytqan demeýshiler tartyldy, Innovate Taraz Hackathon, Pizza Pitch, Idea Battle syndy vorkshoptar men startaptardy ilgeriletýge baǵyttalǵan ınkýbasııalyq baǵdarlamalar iske asyryldy. Sondaı-aq oblysta «Innovasııalyq tehnologııalar parki» óńirlik IT haby Astana Hub belgilegen eń tómengi talaptarǵa sáıkes qajetti ǵımaratpen qamtamasyz etý máselesi sheshildi. Qazirgi ýaqytta ǵımaratty beıimdeý, materıaldyq-tehnıkalyq jabdyqtaý jáne habtyń qyzmetin tıimdi uıymdastyrý boıynsha jumystar bekitilgen josparǵa sáıkes kezeń-kezeńimen júzege asyrylýda.
Búginde oblystyń 2026-2030 jyldarǵa arnalǵan sıfrlyq damý strategııasy ázirlenip, bekitý prosesinde. Atalǵan strategııada sıfrlandyrý jáne jasandy ıntellektini engizýge baǵyttalǵan birneshe mańyzdy joba qarastyrylǵan. Atap aıtqanda, 109 nómiri boıynsha azamattardyń ótinishterin taldaý úshin jasandy ıntellektini engizý (iKomek109), KT (kompıýterlik tomografııa) sýretterin taldaý arqyly ınsýlt pen nevrologııalyq aýrýlardy dıagnostıkalaýdyń dáldigi men jyldamdyǵyn arttyrý, onkologııalyq aýrýlardy erte dıagnostıkalaý úshin jasandy ıntellektini qoldaný kózdelgen. Sonymen qatar, óńirdiń biryńǵaı taldamalyq dashbordyn damytý jáne ıntegrasııalardy keńeıtý, oblystyń aýyldyq eldi mekenderin talshyqty-optıkalyq baılanys jelisine qosý, 5G baılanys jelisin keńeıtý, avtokólik joldary boıynsha antenna-qurylymdyq nysandar salý jáne joǵary jyldamdyqty uıaly ınternet jelisin damytý josparlanǵan. О́ńirlik monıtorıng ortalyǵyn qurý, ınsıdentterge áreket etý mehanızmderin engizý jáne ulttyq kıberqaýipsizdik ortalyqtarymen úılestirý, sıfrlyq saýattylyq pen kıbergıgıenany arttyrý da nazarda. Sonymen birge, iQala jobasy aıasynda tabıǵı monopolııa sýbektileriniń sandyq qyzmetterin ıntegrasııalaý jáne keńeıtý, «Kezekshi karta» júıesinde «Jer balansy» avtomattandyrylǵan jumys ornyn qurý, aýdandyq aýrýhanalarda telemedısına júıesin engizý, proaktıvti densaýlyq saqtaýdy damytý, «e-Jambyl» aqparattyq júıesi negizinde birtutas bilim berý platformasyn qurý, bilim berý qyzmetterin qaıta jobalaý jáne olardyń proaktıvti formattaǵy kórsetilýin damytý, sıfrlyq nomadtardy tartý jáne olardy ustap turý úshin jaǵdaı jasaý, óńirlik sıfrlyq ekonomıkaǵa kadrlardy daıyndaýdy qoldaý, óńirlik IT-qoǵamdastyq pen startap-ekojúıesin damytýǵa qoldaý kórsetý josparlanǵan. Bul bastamalar «Innovasııalyq tehnologııalar parki» avtonomdy klasterlik qorynyń Taraz qalasyndaǵy fılıalynyń bastamalaryn qoldaý arqyly júzege asyrylady.
Eldi mekenderdi sapaly ınternetpen qamtý jumystary da qarqyndy júrgizilýde. Búgingi tańda 353 eldi mekenniń 43-i (12,2 paıyz) – 2G, 51-i (12,2 paıyz) – 3G, al 259 eldi meken (73,4 paıyz) 4G mobıldi ınternetimen qamtamasyz etilgen. Al, talshyqty optıkalyq baılanys jelisimen 357 eldi mekenniń 189-y (50,9 paıyzy) qamtamasyz etilgen, qalǵan 168 (49,1%) eldi meken qamtylmaǵan.
Búginge tańda oblys aýmaǵyndaǵy 54 eldi mekenge talshyqty-optıkalyq baılanys júıesin tartý jumystary júrgizilýde. Sonymen qatar, «Qoljetimdi ınternet» ulttyq jobasyna sáıkes 2023-2025 jyldary «Mobaıl Telekom-Servıs» JShS 68 eldi mekenge 4G bazalyq stansasyn ornatýy josparlaǵan. Búginge 23 eldi mekende jumystar aıaqtaldy. Al «Kcell» AQ 2023-2025 jyldarǵa josparlanǵan 51 eldi mekenniń 47-sinde jumystardy támamdady. «Kar-Tel» JShS 2023-2025 jyldary josparlanǵan 89 eldi mekenniń 73-inde jumystardy oryndap bitti. Atalǵan jol kartasyna sáıkes, 2023-2025 jyldary 208 eldi mekende mobıldi ınternet jelisiniń sapasyn 4G-ge arttyrý josparlanyp, búgingi kúnge 143 eldi mekende tıisti jumystar aıaqtaldy. «Mobaıl Telekom-Servıs» JShS-men (Tele2) Taraz qalasynda 5G/IMT besinshi býyndaǵy 5G tehnologııasyn damytý boıynsha 2024-2025 jyldary 53 bazalyq stansa ornatý josparlanǵan. Qazirgi tańda 32 bazalyq stansa iske qosylǵan. Barlyq atqarylǵan jáne josparlanǵan jumystar Jambyl oblysynyń sıfrlandyrý salasyn damytýdyń mańyzdy qadamy bolyp otyr.
