Foto: 4vlastinfo.kz
E.Saırov osy sıpattaǵy áreketter kınoǵa da jetip, úlken ekranǵa shyqqan «Rýyń kim» fılminiń qajetsiz taqyrypty arqaý etkenine nazar aýdardy.
«Qazaqtyń rýlaryn salystyratyn, kemsitetin fılmderdiń maqsaty qandaı? Tipti bul fılmdi jarnamalaý úshin jasalǵan arnaıy ekzpozısııada rýǵa bólinýdi qoıyp, Qazaqstannyń kartasyn úsh júzge bólip qoıǵanyn kórdik. Bul ne degen bassyzdyq? Ol ult úshin eń sezimtal taqyrypty aıqaılatyp áleýmettik kontent, kıno taqyrybyna aınaldyryp, kórermen jınaý. Túbi bul jaqsylyqqa ákelmeıdi», dedi depýtat.
AMANAT Fraksııasynyń múshesi osy máselege baılanysty Úkimet basshysy Oljas Bektenovke saýal joldap, ult ishinde artyqshylyǵymyzdy kemshilik etip kórsetetin, bir ult ishindegi rýlardy bir-birine aıdap salatyn, arandatýshylyq materıaldarǵa tyıym salynýy tıis ekenin aıtty.
Májilismen jasóspirimder úshin kıno jáne medıakontenttiń tárbıelik yqpaly joǵary ekenin eskerip, osyǵan qatysty birshama usynysyn ortaǵa saldy.
«Birinshi, Aqparat jáne mádenıet mınıstrligi janynan kınoprokatqa shyǵatyn otandyq fılmderdiń mazmunyn aldyn ala kórkemdik-estetıkalyq, ıdeologııalyq, ulttyq birlik turǵysynan saraptaıtyn turaqty komıssııa qurýdy iske asyrý qajet. Ekinshi, «Ulttyq kod» jáne «mádenı erekshelik» uǵymyn jeleý etip, qoǵamdy bólshekteýge, rýshyldyq pen jikshildikti nasıhattaıtyn áreketterge naqty tosqaýyl qoıý kerek. Úshinshi, mádenı salada, áleýmettik jelide, Qazaqstan halqynyń birligin kórsetetin, jalpyulttyq «Biz Qazaqpyz» degen maǵynadaǵy kontentti kóbeıtýge kirisýimiz kerek», dedi E.Saırov.
