Onyń aıtýynsha, tekserýdi IIM-niń kúzet qyzmetin baqylaý departamenti ótken aptada bastaǵan.
«Naqty mýzeıler tizbesi bar. Ulttyq jáne memlekettik mýzeılerdiń bir bóligi polısııa qyzmetkerleri men mamandandyrylǵan kúzet qyzmetiniń baqylaýynda. Al keıbir mýzeıler jergilikti atqarýshy organdardyń quzyretine kiredi. Biz jumysty kelesi aptanyń sońyna deıin tolyq aıaqtap, Úkimet arqyly tıisti usynys engizemiz», dedi Sanjar Ádilov Májilis kýlýarynda.
Vıse-mınıstrdiń atap ótýinshe, elimizdegi mádenı nysandardyń qaýipsizdigin kúsheıtý qajet. Osyǵan baılanysty Ishki ister mınıstrligi ákimdikterge mádenı qundylyqtarǵa qarsy zańsyz áreketterdiń aldyn alý boıynsha arnaıy usynymdar ázirleıdi.
Eske salaıyq, bıyl qazan aıynda Parıjdegi Lývr mýzeıinde iri tonaý deregi tirkelgen bolatyn. Qylmyskerler jeti mınýttyń ishinde jalpy quny shamamen 88 mln eýro bolatyn tarıhı jádigerlerdi alyp ketken. Keıin segiz kúdikti ustalǵanymen, buryn fransýz koroldik áýletiniń múshelerine tıesili bolǵan birqatar qundy buıymdar áli kúnge deıin tabylǵan joq.
