Memorandýmǵa Bas redaktorlar klýbynyń prezıdenti, Qazaqstan Respýblıkasy Parlamenti Senatynyń depýtaty Bıbigúl Jeksenbaı jáne Qorǵanys mınıstriniń tárbıe jáne ıdeologııalyq jumys jónindegi orynbasary, vıse-admıral Serik Borambaev qol qoıdy.
BAQ salasyndaǵy áriptesterimiz áskerı azamattarmen pikir almasyp, túrli suraqtaryna jaýap alǵan mańyzy zor basqosýda aqparattyq jumysty kúsheıtý tetikteri de talqylandy. О́ıtkeni qazaq armııasynyń bedelin bıiktetý, oń ımıdjin qalyptastyrý – árbir azamattyń paryzy. Qazir qoǵamǵa áskerimizdiń áleýetin pash etetin aqparattyq is-sharalar da keń aýqymda atqarylyp jatyr eken. Jıi uıymdastyrylatyn baspasóz týrlary, garnızondardyń jaı-kúıimen tanystyrý, jaýyngerlerdiń turmystyq jaǵdaıy men ashanasyndaǵy mázirge deıin el nazaryna usynylyp júr. Bul árıne durys.
Respýblıkalyq arnalardan balalarǵa arnalǵan anımasııalyq fılmder, eresekterimiz kóretin serıaldar men áskerı baǵdarlamalarǵa basymdyq berilmek. Jańalyqtardan bir-birinen aýmaıtyn sıýjetter de, gazet betterinen baspasóz týrlary jaıyndaǵy jazbalardy da jıi kózimiz shalady.
Qazir oqýlyq shyǵarýmen, balalarǵa arnalǵan kórkem ádebıet basýmen aınalysatyn «ARMAN-PV» baspasynda jumys istep júrgendikten áskerı salany kishkentaı balalar sanasyna sińirý baǵyty da qolǵa alynsa jaqsy bolar edi. Otan qorǵap júrgen jaýyngerler týraly shaǵyn kitaptar, kishkentaı oqyrmandarymyzǵa túsinikti komıkster, tanymdyq ádebıet basylsa degen tilek bar. Máselen oqýshy kúnimde Toqtar Áýbákirovtyń bala kezi, ushqysh bolýǵa talpynǵan jasóspirim kezeńin baıandaıtyn shaǵyn kitapty oqyp shyqqanda keremet áser etip edi. Sol kitapsha meniń ǵana emes kóptegen zamandasymnyń óskende kim bolamyn degen baǵytyn aıqyndap bergeni anyq. Ǵaryshker, ushqysh, áskerı azamat bolsam degen maqsat qoıǵan balalar sany artqany aqıqat. Qazir serıal, baǵdarlama túsirýge qarjy bólýge bel býyp otyrǵan Qorǵanys mınıstrligi osyndaı baǵyttaǵy kitaptar shyǵarsa tamasha bolmaq. Kitap oqıtyn Ultqa aınalýdy maqsat etip otyrǵan kezeńde televızııalyq jobalarǵa ǵana emes kitapqa da kóńil bólinse degen usynys bildirgim keledi. Bastaýysh pen joǵary synyp oqýshylary bala kúninen ózimizdiń áskerimizge degen oń kózqarasy qalyptasyp ósýi óte mańyzdy.
Sondaı-aq, bizde búgingi zamannyń armııasy jaıly kórkem ádebıet múldem joq desek bolady. О́zderińizge málim «Zań-Medıa» JShS detektıv janryn jandandyrý maqsatynda Kemel Toqaev atyndaǵy ádebı baıqaýdy bıyl segizinshi ret uıymdastyrdy. Osylaısha detektıv baǵytynda birqatar kitap jaryqqa shyǵyp, shym-shytyryq oqıǵalar týraly jazatyn qalamgerler shoǵyry qalyptasty. Al bizde áskerı taqyryptaǵy kórkem shyǵarma nelikten damymaıdy? Osy olqylyqtyń da orny tolsa degen usynys bar.
«Aıqyn» gazetiniń bas redaktory Amangeldi Qurmettiń áńgimesin tyńdasańyz, áskerı taqyrypqa qyzyǵýshylyq artady. Ol kisiniń bilmeıtini joq. Qorǵanys salasyn saýatty, jan-jaqty jaza biletin mamandardyń materıaly kóp bolsa utylmas edik. Nege deseńiz gazet oqyǵanda áskerı taqyryptaǵy jalań aqparat qana aldymyzdan shyǵady. Sol sebepti áskerı sarapshylar pýlyn quryp, tanymdyq, saraptamalyq baǵyttaǵy maqalalardyń sany artsa jaqsy bolar edi. О́ıtkeni qazir jaýyngerlerimizdiń garnızondary jyly, tamaqtary toq ekenine jańalyqtar arqyly ábden kózimiz jetti.
Bul usynystarymyzǵa elimizdiń Qorǵanys mınıstri Dáýren Jumataıuly, mınıstrdiń tárbıe jáne ıdeologııalyq jumystar jónindegi orynbasary Serik Jaqsyǵalıuly oń kózqaras tanytady degen úmit bar.
Eń bastysy – ózara memorandýmnyń bereri kóp, Qazaqstan áskeriniń abyroıy asqaq bolsyn dep tileımiz.
Mıras MUQASh,
«ARMAN-PV» baspasy
bas dırektorynyń keńesshisi,
Bas redaktorlar
klýbynyń múshesi
