Jıynda AQIU Bas dırektory, elshi Berik Aryn el Úkimeti men qazaq halqyna turaqty qoldaýy men qonaqjaılyǵy úshin alǵys bildirip, Uıymdy qabyldaýshy memleket retindegi mańyzdy rólin atap ótti. Ol sondaı-aq bıylǵy AQIU-nyń negizgi jetistikterine toqtalyp, Aýǵanstanǵa arnalǵan azyq-túlik qaýipsizdigi baǵdarlamasynyń keńeıtilýin, «Adamzat úshin un – Gazadaǵy tótenshe jaǵdaıǵa úndeý» bastamasynyń iske qosylýy men Afrıkadaǵy azyq-túlik qaýipsizdigi bastamasynyń júzege asyrylý barysyn baıandady. Onyń aıtýynsha, qazir uıym 2031 jylǵa deıingi Strategııalyq kórinisi aıasyndaǵy ilgerileý men IYU-ǵa múshe memleketterde azyq-túlik qaýipsizdigin qamtamasyz etý jónindegi strategııalyq josparǵa sáıkes jumys atqaryp jatyr.
Sonymen qatar, Syrtqy ister mınıstriniń orynbasary Álibek Qýantyrov elimizdiń AQIU-ǵa kórsetip otyrǵan berik saıası qoldaýyn atap ótip, klımattyń ózgerýi, sý tapshylyǵy men jahandyq naryqtaǵy qubylmalylyq jaǵdaıynda azyq-túlik qaýipsizdigi máselelerin sheshýdegi kópjaqty yntymaqtastyqtyń mańyzdylyǵyna toqtaldy. Sondaı-aq Aýyl sharýashylyǵy vıse-mınıstri Ermek Kenjehanuly aýyl sharýashylyǵyn jańǵyrtý, sýarý ınfraqurylymyn jańartý men sý únemdeý tehnologııalaryn keńinen engizý ulttyq basymdyqtardyń qatarynda ekenin aıtyp, AQIU-men birlesken óńirlik jobalardyń iske asyp jatqanyn málimdedi.
Al Májilistiń Agrarlyq máseleler komıtetiniń tóraǵasy Serik Egizbaev elimizdiń agrarlyq áleýetine toqtaldy. Onyń málimdeýinshe, qazir elimizde sý resýrstaryn tıimdi paıdalanyp, AQIU qoldaıtyn bastamalardyń, sonyń ishinde sýarý júıelerin jańǵyrtý qajet. Buǵan qosa, Ortalyq Azııada bıdaı ónimdiligin arttyryp, óńirlik azyq-túlik qaýipsizdigi boıynsha yntymaqtastyqty nyǵaıtý kerek.
Dıplomatııalyq mıssııalar men seriktes uıymdardyń ókilderi tarapynan da saladaǵy ózekti máseleler kóterildi. Palestınanyń elimizdegi elshisi, dıplomatııalyq korpýstyń dýaıeni doktor Montaser Abýzeıd «Adamzat úshin un – Gazadaǵy tótenshe jaǵdaıǵa úndeý» bastamasynyń gýmanıtarlyq mańyzyna toqtalyp, ony qoldaýdyń mıllıondaǵan palestınalyqtar úshin aıryqsha mánge ıe ekenin jetkizdi. Sonymen qatar Qazaqstannyń AQIU-ny qabyldaýshy el retindegi róline joǵary baǵa berip, azyq-túlik qaýipsizdigin qamtamasyz etý, halyqaralyq yntymaqtastyqty damytý, IYU-ǵa múshe memleketter arasyndaǵy ózara yqpaldastyqty nyǵaıtýdaǵy strategııalyq áriptestiktiń mańyzyn atap ótti.
Sondaı-aq, Tájikstan, Aýǵanstan men Iordanııa Hashımıttik Koroldiginiń dıplomatııalyq mıssııalarynyń basshylary, Túrkııanyń Yntymaqtastyq jáne úılestirý agenttigi (TİKA), Halyqaralyq kóshi-qon uıymy (IOM), Araldy qutqarý halyqaralyq qory (IFAS) sııaqty halyqaralyq uıymdardyń ókilderi azyq-túlik qaýipsizdigi salasyndaǵy ózderiniń qazirgi jobalary týraly baıandady. Jalpy jıynda AQIU-men yntymaqtastyqtyń perspektıvti baǵyttary aıqyndalyp, IYU óńirinde júzege asyrylyp jatqan birlesken gýmanıtarlyq, baǵdarlamalyq, áleýetti arttyrý bastamalary talqylandy.
Is-shara aıasynda AQIU men M.Qozybaev atyndaǵy Soltústik Qazaqstan ýnıversıteti arasynda aýyl sharýashylyǵy jáne azyq-túlik qaýipsizdigi salasynda bilim berý, ǵylymı zertteýler, kadrlyq áleýetti damytý baǵytyndaǵy yntymaqtastyqty nyǵaıtýdy kózdeıtin memorandýmǵa qol qoıyldy.
