Astana qalasy ákimdigi №3 kópbeıindi qalalyq aýrýhanasynyń basshysy, medısına ǵylymdarynyń doktory, professor Juldyz Danbaevadan MÁMS-tiń medısınalyq uıymdardy qarjylandyrý qaǵıdaty týraly suradyq. Sebebi osy kúnge deıin kórsetip otyrǵan medısınalyq qyzmettiń aqysyn merziminen kesh alamyz deıtin medısınalyq uıymdardyń baryn bilemiz.
«Biz MÁMS-ke az aqsha tólep, medısınalyq kómektiń sapasy sheteldegideı bolǵanyn qalaımyz. Bizde rasymen qyzmet kórsetý sapasynda kemshilikter bar shyǵar, biraq, negizgi emsharany, medısınalyq kómekti halyq alyp otyr. Onyń ishine operasııalardy qosyńyz. Sosyn qazir KT, MRT apparattary qoljetimdi. Buryn bir qalada bir ǵana MRT, KT bolatyn. Oǵan ekiniń-biri bara bermeıtin. KT – sáýlelik dıagnostıka bolǵan soń, oǵan jıi túse berýge bolmaıdy. Muny halyq túsine bermeıdi. О́zine-ózi dıagnoz qoıyp alatyn pasıentter jergilikti emhanaǵa baryp, dárigerden birden KT talap etedi.
Mysaly, keýde qýysyndaǵy aýrýdy anyqtaý úshin dáriger aldymen rentgen jasaıdy, jiti qaraıdy. Naýqastyń ahýalyn sol tekserýden-aq kórip-biledi. Eger qandaı da bir asqynǵan aýrýlarǵa kúdik bolsa, dáriger ózi sáýlelik dıagnostıka taǵaıyndaıdy. Jumystyń tártibi solaı.
Iá, medısınalyq qyzmettiń aqysyn merziminen kesh alyp júrgenimiz ras. Tólem aldyn ala jasalmaıdy. Bul bizdiń ǵana máselemiz emes, búkil respýblıkadaǵy jaǵdaı osyndaı», dedi saýalymyzǵa jaýap bergen J.Danbaeva.
