Infografıkany jasaǵan – Záýresh SMAǴUL, «EQ»
Ulttyq joba aıasynda boı kótergen mektepter qala men aýylǵa birdeı standartpen salyndy. Syrtqy kelbeti men ishki jabdyqtalýynda aıyrmashylyq joq. Bul – qala men aýyl arasyndaǵy bilim sapasy men ınfraqurylym alshaqtyǵyn azaıtý maqsatynda jasalyp otyr.
Jańa bilim ordalary zamanaýı talaptarǵa saı jabdyqtalǵan. Mektepterde keń ári jaryq synyptar, sońǵy úlgidegi oqý quraldary, STEM jáne kompıýterlik kabınetter, sport, májilis zaldary, kitaphana men ashana qamtylǵan. Balalardyń qaýipsizdigi úshin beınebaqylaý júıeleri ornatylyp, ınklıýzıvti bilim alýǵa tolyq jaǵdaı jasalǵan. Jobanyń mańyzdy ereksheliginiń biri – shalǵaı eldi mekenderge basymdyq berilýi. Ulttyq joba aıasynda alys aýyldarda da iri ári zamanaýı mektepter salyndy. Memlekettik baqylaýdyń, jaýapty oryndaýshylardyń úılesimdi jumysynyń nátıjesinde qurylys jumystary belgilengen merzimnen keshikpeı aıaqtaldy. «Samruk Construction» kompanııasynyń málimdeýinshe, jobany iske asyrý barysynda sapa talaptary basty nazarda ustalyp, ár nysan tolyq qabyldaý rásiminen ótken.
Almaty qalasynda «Keleshek mektepteri» ulttyq jobasy aıasynda 21 zamanaýı mektep salý josparlanǵan. Onyń 13-i «Samruk-Kazyna Construction» AQ basqarýymen, al qalǵan 8 mektep qala ákimdigi tarapynan memleket-jekemenshik áriptestigi jáne daıyn nysandardy satyp alý tetikteri arqyly salynyp jatyr. «Samruk-Kazyna Construction» AQ basqarýyndaǵy 13 mekteptiń barlyǵynda qurylys-montajdaý jumystary tolyq aıaqtalǵan. Basqarma tóraǵasy Máýlen Aımanbetovtiń aıtýynsha, №97 jáne №154 mektepter buryn apatty jaǵdaıda bolǵan eski ǵımarattardyń ornyna boı kótergen. Eski nysandar tolyq buzylyp, olardyń ornyna qaýipsiz ári zamanaýı mektepter salynǵan.
«Biryńǵaı operatordyń basqarýymen el tarıhynda alǵash ret árqaısysy 2 500 oryndyq eki iri mektep paıdalanýǵa berildi. 2 500 oryndyq mektepterdiń normatıvtik qurylys merzimi 28 aı. Biz olardy 22 aıda aıaqtadyq. Bul – tek Almatydaǵy emes, respýblıka boıynsha eń iri oqý oryndary», deıdi M.Aımanbetov.
Al Astana qalasynda «Keleshek mektepteri» ulttyq jobasyn iske asyrý máresine taıap qaldy. Josparlanǵan 22 mekteptiń 21-inde, ıaǵnı 39 200 oqýshy ornyna arnalǵan nysandarda qurylys jumystary tolyq aıaqtalǵan. 2000 oryndyq bir mektep jaqyn ýaqytta paıdalanýǵa beriledi.
Sonymen qatar jaqynda Mańǵystaý oblysyndaǵy «Keleshek mektepteri» jobasy aıaqtalyp, sońǵy 13-mektep oqýshylardy qabyldady. Jańa formattaǵy bilim uıymy 1 500 oqýshyny qamtı alady.
«Búginde memleketimizdiń basty basymdyqtarynyń biri – sapaly bilim júıesin qalyptastyrý. Osy oraıda, «Keleshek mektepteri» ulttyq jobasy aıasynda boı kótergen jańa bilim ordasy – bizdiń mektebimiz, osy bastamanyń jarqyn kórinisi dep bilemiz. Jańa mektep – tek ǵımarat emes, bul – jańasha oılaý, jańasha oqytý, zamanaýı múmkindiktermen jabdyqtalǵan zııatkerlik keńistik. Munda oqýshylarymyz bilim alyp qana qoımaı, tulǵalyq damýǵa, shyǵarmashylyqpen aınalysýǵa, sıfrlyq saýattylyqtaryn arttyrýǵa barlyq jaǵdaı jasalǵan. Mektep ujymy – tájirıbeli, jańashyl ustazdardan quralǵan. Biz bilim men tárbıeni teń ustaýdy basty mindet sanaımyz. Balanyń jan-jaqty damýy, qaýipsiz ortada erkin oılap, óz bolashaǵyn qalyptastyrýy – bizdiń kúndelikti jumysymyzdyń negizi», deıdi Aqtaý qalasy №35 mektep dırektory Lıýbov Nam.
Respýblıka boıynsha 10 óńirde mektepter tolyq paıdalanýǵa berildi. Jalpy, 217 300 oqýshy ornyna eseptelgen 208 mekteptiń 187-si tolyq salynyp bitti. Qalǵan 21 mekteptiń qurylys-montajdaý jumysy ǵana qalǵan. Atap aıtsaq, Almaty qalasynda – 13 mektep, 23 100 oqýshy oryn, Shyǵys Qazaqstan oblysynda – 7 mektep, 3 000 oryn, Soltústik Qazaqstan oblysynda – 2 mektep, 1 200 oryn, Pavlodar oblysynda – 2 mektep, 1 800 oryn, Qyzylorda oblysynda – 10 mektep, 6 900 oryn, Mańǵystaý oblysynda – 13 mektep, 12 600 oryn, Jambyl oblysynda – 7 mektep, 6 200 oryn, Aqmola oblysynda – 9 mektep, 12 200 oryn, Shymkent qalasynda – 12 mektep, 17 300 oryn, Ulytaý oblysynda – 1 mektep, 300 oryn, Jetisý oblysynda – 2 mektep, 1 800 oryn qoldanysta.
Sondaı-aq Oqý-aǵartý mınıstrliginiń málimetinshe, «Keleshek mektepteriniń» jartysyna jýyǵy aýylda ornalasqan. Sonyń ishinde eń shalǵaıy shekara mańyńdaǵy Jońǵar qaqpasynyń eteginde jatqan Dostyq aýylynda boı kóterdi. Bir aýysymda 600 bala qabyldaı alatyn nysan standartqa saı. Mektep balalarǵa qajetti barlyq quralmen jabdyqtalǵan.
