1968 jyly týǵan naýqas sońǵy 5 jyl boıy arterııalyq gıpertenzııamen aýyrǵan. Sońǵy birneshe jylda qan qysymy únemi 250/140 mm syn.baǵ. jáne odan da joǵary bolyp, bul ómirge asa qaýipti jaǵdaıǵa ákelgen.
Mundaı jaǵdaıda kez kelgen ýaqytta mı qan tamyry jarylyp, ınsýlt alý qaýpi óte joǵary bolǵan. 2024 jyly naýqastyń qursaq aortasyna stent-graft ımplantasııalanǵan.
– Aýrýhanaǵa aýyr halde túsken naýqas tolyq tekserýden ótkizildi. Tekserý nátıjesinde sol jaq búırekke baratyn arterııanyń 99% tarylǵany anyqtaldy. Aortada stent-graft ornatylǵandyqtan, dástúrli shýnttaý operasııasyn jasaý múmkin bolmady. Osyǵan baılanysty naýqastyń sol búıregi alynyp, oń jaq myqyn arterııasyna qaıta tigilip ornalastyryldy, – delingen habarlamada.
Operasııa qan tamyr hırýrgtary men transplantologtardyń birlesken jumysynyń nátıjesinde sátti ótti.
Qazirgi tańda naýqastyń jaǵdaıy turaqty, bólimshege aýystyryldy. Qan qysymy qalpyna keldi.
Búırek aýtotransplantasııasy – búırekti tolyq alyp tastamaı, aǵzany saqtap qalýǵa múmkindik beretin joǵary tehnologııalyq jáne sırek jasalatyn ota túri. Atalǵan operasııanyń Shymkent qalasynda alǵash ret jasalýy óńirlik medısınanyń joǵary deńgeıge kóterilgenin kórsetip, kúrdeli dıagnozy bar naýqastardy óz óńirinde emdeýge úlken múmkindik ashyp otyr.
