Mańǵystaýda munaı óńdeý zaýytyn salý máselesi aıtyldy

AQTAÝ. 23 aqpan. Mańǵystaý oblysy – munaı óńdeýshi zaýyt qurylysy úshin taptyrmas oryn. Esep berý kezdesýinde aımaq basshysy Alık Aıdarbaev osylaı dedi. Bul týraly egemen.kz tilshisi habarlady. «Qazirgi tańda elimizde 4-shi munaı óńdeý zaýytyn salý kún tártibinde tur. Elimizdegi birqatar óńirler bul zaýyttyń óz aýmaqtarynda bolǵanyn qalaıdy. Mundaı zaýytqa meken bolýǵa Mańǵystaýdyń da múmkindigi mol. Tutynýshylardyń deni ortalyq pen ońtústikte ornalasqan, sondyqtan Mańǵystaýdyń qashyqta ornalasýy basty sebepterdiń biri. Jańa MО́Z eksportqa baǵyttalýy kerek desek, bizdiń osy tusta artyqshylyqqa ıemiz. Iran elimen kórshi, ınvestısııalyq tartymdylyǵy jańa deńgeıge kóterilgen, teńiz jaǵasynda ornalasqan, jańa porttar, temirjol qurylysy órkendeý ústindegi Mańǵystaýdan qolaıly óńir Qazaqstanda joq, – degen A. Aıdarbaev, zaýyttyń Parsy shyǵanaǵy men Eýropa elderine jetkiziletin munaı ónimderiniń eksportyn damytýǵa múmkindik beretindigin aıtty. Sondaı-aq, ákim jańa munaı óńdeıtin zaýytty bıýdjet qarjysyna emes, ınvestısııa tartý arqyly salý qajettigin alǵa tartty. Muny ózge taraptardyń qyzyǵýshylyǵyn arttyrýy múmkin ekendigimen túsindire kele, qazirdiń ózinde Qytaı men Iran eliniń atalmysh qurylysqa qyzyǵýshylyq tanytyp otyrǵandyǵyn jetkizdi. Gúlaıym Shyntemirqyzy. Derek, sýret egemen.kz.