Foto: Úkimettiń baspasóz qyzmeti
«Aýylda densaýlyq saqtaýdy jańǵyrtý» ulttyq jobasy sheńberinde Úkimet óńirlerge áleýmettik mańyzdy ınfraqurylymdy damytýǵa erekshe kóńil bólip otyr.
Qaraǵandydaǵy jańa onkologııalyq ortalyq
Oblys ortalyǵyndaǵy onkologııalyq ortalyqtyń jumysy jańa beleske shyqpaq. Onyń operasııalyq-reanımasııalyq blogyn eń sońǵy úlgidegi qural-jabdyqtarmen qamtamasyz etý úshin 6,2 mlrd teńge bólindi. Sonymen qatar, oblystyq bıýdjetten 1,74 mlrd teńge qosymsha qarjy qarastyrylǵan. Qazirgi ýaqytta ǵımarattyń ishki árleýi júrip jatyr, al nysannyń jalpy daıyndyǵy 70%-dy quraıdy.
Balqashtaǵy zamanaýı medısınalyq hab
Balqash qalasyndaǵy kópbeıindi aýrýhananyń bazasynda naǵyz óńirlik medısınalyq hab boı kóterip keledi. Bul maqsatqa 1 mlrd teńgeden astam qarajat jumsaldy (jalpy quny – 1,27 mlrd teńge). Qazirgi ýaqytta angıografııalyq operasııalyq jáne dıagnostıkalyq bólimsheler ornalasatyn jańa korpýstyń qurylysy 96%-ǵa aıaqtalǵan. Qańqany turǵyzý, ınjenerlik jeliler men ishki árleý jumystary bitti. Nysan osy jyldyń sońyna deıin el ıgiligine beriledi dep kútilýde. Bul Balqash turǵyndaryna ınfarkt pen ınsýlt kezinde «altyn saǵatta» joǵary tehnologııalyq kómek alýǵa múmkindik beredi.
Balalarǵa arnalǵan jańa ońaltý ortalyǵy
Balqash qalasynda burynǵy sanatorıı ǵımaratyn qaıta jańǵyrtý arqyly balalardy ońaltý ortalyǵy qurylyp jatyr. Bul ıgi iske 272,1 mln teńge baǵyttaldy. Munda stasıonarlyq jáne ambýlatorııalyq qyzmetter uıymdastyrylady. Ortalyqta reabılıtologtar, nevropatologtar, logopedter men EDSh nusqaýshylarynan turatyn bilikti mamandar toby jumys isteıtin bolady. Bul erekshe qajettilikteri bar balalardyń oblys ortalyǵyna sabylmaı-aq, óz qalasynda em alýyna jaǵdaı jasaıdy. Jumystardy aıaqtaý 2026 jyldyń aqpanyna josparlanǵan.
