Foto: istockphoto.com
Memleket basshysynyń tapsyrmasy aıasynda atqarylǵan jumystardyń nátıjesinde oblystyń eń qıyr shetindegi aýyldarǵa deıin taza sý bardy. Atap aıtqanda, Aral qalasynan 120 shaqyrym qashyqtyqta, qum jıeginde ornalasqan Aqbasty aýylyna da ortalyqtandyrylǵan sý júıesi tartyldy. Osylaısha, óńirdegi sý máselesi tolyqtaı tarıh qoınaýyna ketti.
Turǵyndardyń kópjyldyq ótinishi bolǵan kópqabatty úılerge ystyq sý berý máselesi de qarqyndy sheshilip jatyr. Osy maqsatqa 26 mlrd 200 mln teńge bólinip, 423 turǵyn úıdi qamtıtyn úlken joba bastaldy:
- Birinshi kezeń: 2024 jyly 186 úı ystyq sýǵa tolyq qosyldy (11 mlrd teńge bólindi).
- Ekinshi kezeń: Qalǵan 237 úıdi qamtý úshin 15,2 mlrd teńge qarastyrylǵan. Qazirgi tańda 61 úıge sý jetkizilse, arnaýly memlekettik qordyń qoldaýymen qalǵan nysandarda jumys qyzyp jatyr.
Infraqurylymdy jaqsartý tek sýmen shektelmeıdi. 2022-2024 jyldar aralyǵynda «Aýyl – el besigi» jobasy aıasynda 31 mlrd 600 mln teńge ıgerildi. Bul qarjyǵa 78 aýylda áleýmettik nysandar men ınjenerlik jelilerdi jańǵyrtqan 343 joba júzege asyrylyp, aýyl ómiriniń sapasy jańa deńgeıge kóterildi.
