Foto: istockphoto.com
Myńdaǵan otbasy qonys toıyn toılady
Oblys tarıhynda sońǵy úsh jylda alǵash ret barlyq aýdanda birdeı turǵyn úı qurylysy jappaı qolǵa alyndy. Nátıjesinde 1 800-ge jýyq otbasy baspanaly bolyp, armandaryna qol jetkizdi. Atap aıtqanda:
- 2023 jyly – 430 páter;
- 2024 jyly – 1015 páter;
- 2025 jyly – 332 páter paıdalanýǵa berildi.
Bıyl bul qarqyn báseńdemeıdi: bıýdjetten bólingen 58,7 mlrd teńgege taǵy 3600 páterlik úılerdiń qurylysy bastaldy.
О́ńirdegi qurylys jumystarynyń ózegi – óskeleń urpaqtyń sapaly bilim men tárbıe alýyna baǵyttalǵan. «Bilimdi qoldaý qorynyń» 8,4 mlrd teńgesine salynǵan fızıka-matematıka baǵytyndaǵy «Bilim-ınnovasııa» lıseı-ınternaty men Aral aýdanyndaǵy jańa mektep sonyń aıqyn dáleli.
Sonymen qatar Qyzylorda qalasynda 11 mlrd teńgege «Syr juldyzdary» akademııasy boı kóterip jatsa, iri kompanııalardyń demeýshiligimen zamanaýı Oqýshylar saraıy men mýzykalyq kolledjdiń jańa ǵımaraty ashyldy. Bolashaq mamandardy daıarlaıtyn «Quzyrettilik ortalyǵy» men balalardyń jyl boıy tynyǵatyn demalys lageri de aımaqtyń ajaryn asha túspek.
Jasyl aımaq jáne týrızm: Qyzylordanyń jańa kelbeti
«Taza Qazaqstan» baǵdarlamasy aıasynda oblys ortalyǵy tanymastaı ózgerdi. Qaıta jańǵyrǵan Prezıdent saıabaǵy, Qorqyt Ata memorıaldy alleıasy men jańarǵan qalalyq demalys parki turǵyndardyń súıikti ornyna aınaldy. Aldaǵy ýaqytta Syrdarııa ózeniniń ústinen ótetin jaıaý júrginshiler kópiri men bes juldyzdy qonaqúı qurylysy aıaqtalǵanda, Qyzylordanyń týrıstik áleýeti tipti arta túspek.
Aýyldardy abattandyrýǵa baǵyttalǵan «Úlgili eldi meken» konkýrsy da óz jemisin berip, jeńimpaz aýyldar zamanaýı tehnıkalarmen jaraqtandyrylyp jatyr. Osylaısha, Syr óńiri búginde tek kúrishtiń otany ǵana emes, jasampaz qurylys pen jaıly ómirdiń mekenine aınalyp keledi.
