Ortalyqta bir ýaqytta 18 jasqa deıingi 125 balaǵa 8 baǵyt boıynsha jartylaı stasıonarlyq jaǵdaıda sapaly áleýmettik qyzmetter kórsetiledi.
Irgeles jatqan 4 aýdan, qalanyń 90-ǵa jýyq turǵyny turaqty jumyspen qamtylady. Jańa ortalyq zamanaýı quraldarmen jabdyqtalyp, balalar úshin barlyq jaǵdaı jasalǵan.
Ortalyqtyń ashylý rásiminde «Samuryq-Qazyna» AQ-nyń basqarýshy dırektory Ǵıbrat Aýǵanov joba biryńǵaı standarttar negizinde júzege asyrylyp, turaqty áleýmettik nátıjege baǵyttalǵanyn atap ótti. Sondaı-aq Saryaǵash qalasynda jáne Turar Rysqulov aýylynda «Ainala» ońaltý ortalyqtary óz jumysyn bastaıtynyn, al jyl sońyna deıin qordyń qoldaýymen ashylǵan osyndaı ortalyqtardyń sany 55-ke jetetinin málim etti.
Atalǵan ortalyq Túrkistan oblysy jumyspen qamtýdy úılestirý jáne áleýmettik baǵdarlamalar basqarmasyna tıesili jáne jartylaı stasıonarlyq úlgisinde jumys isteıdi. Balalarǵa turmystyq, áleýmettik-medısınalyq, áleýmettik-psıhologııalyq, pedagogıkalyq, áleýmettik-mádenı, áleýmettik-quqyqtyq jáne áleýmettik-ekonomıkalyq qyzmetter kórsetiledi. Zamanaýı talapqa saı ortalyqtyń materıaldyq-tehnıkalyq bazasyn nyǵaıtýǵa «Qazaqstan halqyna» qoǵamdyq qorynyń seriktesteri – «Qamqorlyq» korporatıvtik qory men «Samruk-Kazyna Trust» korporatıvtik qory birlesip, 350 mln teńge, al qyzmetkerlerdi oqytýǵa 40 mln teńge qarajat bóldi. Jańa ortalyq óńirde aýtızm jáne basqa da mentaldy buzylystary bar balalardyń minez-qulqyn túzetýge, olardyń qoǵamǵa beıimdelýine jáne tolyqqandy áleýmettenýine oń yqpal etetin mańyzdy áleýmettik nysan bolmaq.
Aıta keteıik, búginde Túrkistan oblysynda múgedektigi bar adamdardyń jalpy sany 102 myń bolsa, onyń ishinde 15 457-i balalar. Al 2025 jylǵy 1 jeltoqsandaǵy málimetke sáıkes oblys aýmaǵynda aýtıstik spektriniń buzylýy dıagnozy qoıylǵan 398 bala tirkelgen.
