Jýrnalıster aımaq basshysynan atalǵan avtovokzalǵa baılanysty jaǵdaıdy surady. Buǵan deıin jergilikti jalǵa alýshylar ákimdik vokzal ornalasqan jer telimin tartyp alǵysy keledi dep málimdep, sol sebepti nysanda jıi tekseris júrgizilip, kásipkerlerdiń jumysyna kedergi keltirilip jatqanyn aıtqan.
Alaıda oblys ákimi bul aqparatty joqqa shyǵardy.
– О́kinishke qaraı, talap qoıyla salysymen «bireý tartyp almaqshy» degen áńgime shyǵady. Tipti «ákim ózine alǵysy keledi» dep te aıtady. Ákimge ol avtovokzal ne úshin kerek? Ol eshkimge qajet emes. Biz adal jumys istep, zańdy saqtaıtyn kásipkerlerge eshqashan kedergi keltirmeımiz, kerisinshe qoldaımyz. Al eger bireý tártip buzyp, qalanyń syrtqy kelbetin búldirse, talap qoıý – bizdiń mindetimiz, – dedi Nurlybek Nálibaev.
Ákimniń aıtýynsha, eger jalǵa alýshylar sanıtarlyq jáne ózge de talaptardy tolyq saqtasa, olardyń jumysyna eshkim bóget jasamaıdy, al tekserister zań aıasynda júrgiziledi. Ákimdik aýmaq pen ǵımarattyń tıisti jaǵdaıda bolýyn talap etýge mindetti ekenin de atap ótti.
– Bul avtovokzal óte eski. Biz ıelerine birneshe ret kúrdeli jóndeý júrgizip, jańa ǵımarat salýdy usyndyq. Avtovokzal adamdarǵa shynymen qajet. Biraq ashyǵyn aıtqanda, eshqandaı jaǵdaı jasalmaǵan, bul uıat. Birneshe ret eskertý jasadyq, alaıda kásipkerler qulaq aspady. Basqa kásipkerlerge jańa avtovokzal salýdy usyndyq, biraq qoldaý bolmady, – dedi aımaq basshysy.
Onyń aıtýynsha, osy sebepti oblystyq bıýdjetten 975 mln teńge bólinip, Qyzylordada jańa avtovokzal salynǵan. Qazirgi tańda ol tolyqqandy jumys istep tur.
– Eger jolaýshy retinde eki avtovokzalǵa da baryp, salystyryp kórseńiz, eskisiniń nege tolyq jumys istemeıtinin jáne adamdardyń nelikten jańasyn tańdaıtynyn túsinesiz, – dep túıindedi Nurlybek Nálibaev.
