«Samuryq-Qazyna» Jumysshy mamandyqtar jylyn qorytyndylady

– «Samuryq-Qazyna» toby Jumys­shy mamandyqtar jyly aıasynda jumystardy júıeli túrde atqaryp keledi. Búginde qor kompanııalarynda 250 myńnan astam adam eńbek etedi, onyń ishinde 190 myńnan astamy – jumysshy mamandyq ıeleri. Bul – eldiń ónerkásiptik áleýetiniń ózegi ári turaqty ekonomıkalyq ósýdiń berik negizi, – dedi qor basshysy Nurlan Jaqypov.

Ulttyq ál-aýqat qory bıyl osy baǵyt­ta aýqymdy is-sharalar ótkizip, eńbek adamy­nyń bedelin arttyrýǵa barynsha atsa­lysty. Sonyń ishinde adam kapıtalyn damytý basym baǵyttardyń biri boldy. Máse­len, jyl basynan beri 175 myńnan astam qyzmetker biliktilikti arttyrý kýrs­tarynan ótken. Bul oraıda «Bastaý», «О́rleý», sondaı-aq korporatıvtik sheber­lik, tálimgerlik baǵdarlamalary iske asyrylyp jatyr.

Halyqaralyq seriktestik aıasynda qor tobynyń mamandary ozyq tehnologııalar men jańa qaýipsizdik standarttaryn meńgerý maqsatynda taǵylymdamalarǵa baryp, bilimderin tolyqtyryp otyrady. Tájirıbeli mamandarmen qatar, jas kadrlarǵa da erekshe kóńil bólinedi. Olar úshin «Jeti qadam», «Murager», «Alyp» baǵdarlamalary qarastyrylǵan. Jas mamandar atalǵan baǵdarlamalar boıynsha tálimgerlikten ótedi, kóshbasshylar mektebinde bilim alyp, óndiris tıimdiligin arttyrý jobalaryna qatysyp, bilimi men biliktiligin shyńdaıdy.

– Bıyl kompanııa jumysshy maman­darǵa arnalǵan túrli kýrstar, oqý, tájirı­be almasý baǵdarlamalaryn ótkizip jatyr. Myna forým da óte joǵary deń­geıde uıymdastyrylǵan eken. Men Qyzylordadan elordaǵa osy sharaǵa arnaıy keldim. Temirjolshylar áýletinenmin. Ákemniń izin jalǵap, osy temirjol salasynda altynshy jyl eńbek etip kelemin. Biz sııaqty jas mamandarǵa bul tamasha múmkindik, – dedi Qyzylorda lokomotıv paıdalaný deposynyń taspa taldaý ınjeneri Aıaýjan Asqarqyzy.

Qor tobynyń jumysshylary ha­lyqaralyq deńgeıdegi baıqaýlarǵa qatysyp, bıikten kórinip júr. Máselen, «AtomSkills», «Haıtek-2025» syndy bedeldi chempıonattarda jerlesterimiz 15 júldeli orynǵa ıe bolyp, otandyq mamandardyń kásibı biliktiligi joǵary ári básekege qabiletti ekenin dáleldedi.

«Samuryq-Qazyna» kadrlardy daıar­laý qyzmetin kezeń-kezeńimen qalyp­tastyryp keledi, ıaǵnı stýdentten bastap bilikti maman atanǵanǵa deıin júıeli jumys atqarylady. Bul rette qor toby elimizdiń jetekshi oqý oryndarymen 100-ge tarta memorandýmǵa qol qoıǵan. Mysaly, «Qazaqtelekom» – Ońtústik Koreıanyń «Woosong» ýnıversıtetimen, «Qazatomónerkásip» QBTÝ-men kelisim ornatty. Osylaısha, 10 myńnan astam stýdent dýaldy oqytý baǵdarlamasy men qor tobynyń kásiporyndarynda óndiristik tájirıbeden ótip jatyr.

Alǵash ret «Atyraý munaı jáne gaz ýnıversıteti» bazasynda «QazMunaıGaz» kompanııasymen birlesip, munaı-gaz salasyna arnalǵan oqý-óndiristik polıgon ashyldy. Munda tolyq óndiristik sıkl jaǵdaıynda jumysshy, ınjenerlik-tehnıkalyq kadrlar daıarlanady.

Bıyl qor áleýmettik jaýap­ker­shilikke de kóp kóńil bóldi. Ata-ana­larynyń qamqorlyǵynsyz qalǵan balalardy jáne áleýmettik osal sa­nattaǵy jastardy qoldaýǵa baǵyt­­talǵan «Samuryq úmiti», «Tálimger» jobalary iske asyrylyp jatyr. Bul bastamalar aıasynda Pavlodar, Shyǵys Qazaqstan oblystarynda balalar úıiniń 100 tárbıelenýshisine qoldaý kórsetildi. Búginde olardyń 38-i kolledj­derde oqıdy. Budan bólek, 107 túlek qordyń kásiporyndarynda jumysqa ornalasyp, eńbek etip júr.

Sonymen qatar qyzmetkerlerdiń ómir súrý sapasyn arttyrý kompanııa ókilderiniń basty nazarynda. «Otbasy bankpen» birlesip jeńildetilgen turǵyn úı baǵdarlamalary iske asyrylyp jatyr. Naqtyraq aıtqanda, Ekibastuz, Astana qalalarynda jumysshylarǵa arnalǵan turǵyn úıler salýǵa qatysty qanatqaqty jobalar bastaldy. Aldaǵy ýaqytta bul baǵdarlamany ózge de óńirlerde iske qosý josparlanyp otyr.

Eńbek qaýipsizdigine de jiti den qoıylǵan. Infraqurylymdy jańǵyrtý, oqytý, apatty jaǵdaıdyń aldyn alý sharalarynyń nátıjesinde óndiristegi jaraqattaný deńgeıi 44%-ǵa tómendegen. Bul oraıda qor óndiriske sıfrlyq transformasııany engizý jumystaryn belsendi atqaryp keledi. Jyl sońyna deıin jasandy ıntellekt tehnologııa­lary kadr úderisterine, personaldy basqarý, eńbek qaýipsizdigi júıesine engiziledi.

Kadrlyq áleýetti damytýmen qatar, qor aza­mattardyń ómir sapasyna tikeleı áser etetin iri ınvestısııalyq jobalardy jú­zege asyryp jatyr. 2025 jyly sý, gaz tartý, energetıka, logıstıka, taza energııa sa­lalarynda jalpy quny 1,1 trln teńgeden asatyn 9 strategııalyq joba aıaq­taldy. Olardyń qatarynda Kendirli aýy­lyn­daǵy sý tushytý zaýyty, Caspi Bitum zaýyty, «Taldyqorǵan – Úsharal» gaz qu­by­ry, Jańaózendegi kún elektr stansasy, Aqtaýdaǵy jańa konteınerlik hab pen Almatydaǵy Zhetysu termınaly bar.

– «Samuryq-Qazyna» qory Jumysshy maman­dyqtar jylyn bir rettik naýqan emes, uzaqmerzimdi strategııa retinde qaras­ty­rady. Biz aldaǵy ýaqytta da osy ba­ǵyt­­­taǵy jumystardy jalǵastyramyz, – dedi «Samuryq-Qazyna» qorynyń basqa­rý­shy dırektory Ǵıbrat Aýǵanov forým barysynda.

Shara qorytyndysynda «Samuryq-Qazyna» qory óndiristik ujymdardyń úzdik maman­­daryn, kadr áleýetin damytý­ǵa eleýli úles qosqan portfeldik kompa­nııalar­dyń qyzmetkerlerin marapattady.

Jansaıa QAPASQYZY